కెసిఆర్, విజయశాంతి రాజీనామాల తిరస్కృతి

న్యూఢిల్లీ: లోకసభ సభ్యత్వాలకు తెలంగాణ రాష్ట్ర సమితి (తెరాస) సభ్యులు చేసిన రాజీనామాలను లోకసభ స్పీకర్ మీరా కుమార్ తిరస్కరించారు. షరతులు పెట్టి రాజీనామాలు చేయడం వల్ల ఆమె వారి రాజీనామాలను తిరస్కరించారు. తెలంగాణ సాధన కోసం రాజీనామాలు సమర్పించాలనే తెలంగాణ ఐక్య కార్యాచరణ కమిటీ (జెఎసి) నిర్ణయంతో వీరు చేసిన రాజీనామాలకు సరైన కారణాలు లేవని ఆమె అన్నారు. వారి రాజీనామాలు నిబంధనల మేరకు లేవని ఆమె చెప్పారు.

కాగా, తెలంగాణ కాంగ్రెసు పార్లమెంటు సభ్యులు తమ రాజీనామాలను ఉపసంహరించుకున్నట్లు ఆమె తెలిపారు. తెలంగాణ రాష్ట్ర ఏర్పాటు ప్రక్రియను ప్రారంభిస్తున్నట్లు కేంద్ర హోం మంత్రి పి. చిదంబరం డిసెంబర్ 9వ తేదీన చేసిన ప్రకటనను మార్చుకుంటూ డిసెంబర్ 23వ తేదీన చేసిన ప్రకటనకు నిరసనగా వారు రాజీనామాలు చేశారు. వాటినే స్పీకర్ తిరస్కరించారు. తాజాగా, కెసిఆర్, విజయశాంతి మళ్లీ రాజీనామాలు చేసే అవకాశం ఉంది.