తెలంగాణపై చంద్రబాబు తేల్చాల్సిందే: అమర్ సింగ్

న్యూఢిల్లీ: తెలంగాణపై ఆంధ్రప్రదేశ్ ముఖ్యమంత్రి కె. రోశయ్య, తెలుగుదేశం పార్టీ అధ్యక్షుడు నారా చంద్రబాబు నాయుడు తమ స్పష్టమైన వైఖరి వెల్లడించాలని సమాజ్ వాదీ బహిష్కృత నేత అమర్ సింగ్ డిమాండ్ చేశారు. తెలంగాణకు తన సంపూర్ణ మద్దతు ఉంటుందని ఆయన అన్నారు. న్యూఢిల్లీలోని జంతర్ మంతర్ వద్ద ఆయన సోమవారం తెలంగాణ న్యాయవాదుల ధర్నానుద్దేశించి ప్రసంగించారు. కాలయాపన చేయడానికే కమిటీ, కమిషన్ లని ఇదివరకే నిరూపితమైందని, ప్రస్తుతం వేసిన శ్రీకృష్ణ కమిటీ కూడా కాలయాపన కోసమేనని ఆయన అన్నారు. రెండు మూడు నెలల్లో శ్రీకృష్ణ కమిటీ తన నివేదికను సమర్పించాలని ఆయన డిమాండ్ చేశారు. తెలంగాణ రాష్ట్ర ఏర్పాటు డిమాండ్ ఇప్పటిది కాదని, తెలంగాణ ఇవ్వాల్సిందేనని ఆయన అన్నారు. రెండు వేల మందికి పైగా తెలంగాణ న్యాయవాదులు ధర్నాలో పాల్గొన్నారని ఆయన అన్నారు.

ఎన్ని అవాంతరాలు వచ్చినా తెలంగాణ సాధిస్తామని తెలంగాణ జెఎసి కన్వీనర్ కోదండరామ్ అన్నారు. ఉస్మానియా విశ్వవిద్యాలయంలోకి తనలాంటి ప్రొఫెసర్ నే పోలీసులు వెళ్లనీయడం లేదని, ఇక నక్సలైట్లను ఎలా విశ్వవిద్యాలయంలోకి ఎలా పోనిస్తారని ఆయన అన్నారు. రాష్ట్రంలో ప్రభుత్వం కొనసాగినా, సంక్షోభం వచ్చినా తెలంగాణ ప్రజలకు ఒరిగేదేమీ లేదని ఆయన అన్నారు. శాసనసభ్యులందరూ రాజీనామాలు చేస్తే ఢిల్లీ ప్రభుత్వం హైదరాబాదు తరలి వస్తుందని ఆయన అన్నారు. బిజెపి ఆంధ్రప్రదేశ్ వ్యవహారాల ఇంచార్జీ ప్రకాష్ జవేదకర్ కూడా న్యాయవాదులను ఉద్దేశించి ప్రసంగించారు. పార్లమెంటులో తెలంగాణ రాష్ట్ర ఏర్పాటుకు బిల్లును ప్రతిపాదించాలని డిమాండ్ చేస్తూ లాయర్లు ధర్నాకు దిగారు.