తెలంగాణ కోసం విద్యార్థిని ఆత్మహత్య

హైదరాబాద్: తెలంగాణ ఏర్పాటులో జాప్యానికి నిరసనగా మరో ఆత్మహత్య జరిగింది. రంగారెడ్డి జిల్లాలో యాదయ్య ఆత్మహత్య విషాదం మరిచిపోక ముందే మరో ఆత్మహత్య చోటు చేసుకుంది. రంగారెడ్డి జిల్లా మొయినాబాద్ మండలం అజీజ్ నగర్ కు చెందిన సరిత అనే విద్యార్థిని ఉరేసుకుని సోమవారం సాయంత్రం మరణించింది. హైదరాబాదులోని మెహిదీపట్నంలో గల ఒక ప్రైవేట్ కళాశాలలో ఆమె ఇంటర్మీడియట్ చదువుతోంది.

సూసైడ్ నోట్ రాసిపెట్టి ఆ విద్యార్థిని ఆత్మహత్య చేసుకుంది. ముఖ్యమంత్రి కె. రోశయ్య పేర ఆమె లేఖ రాసింది. తెలంగాణ రాకుండా ఎన్నాళ్లు ఆపుతారంటూ సరిత ఆ లేఖలో ప్రశ్నించింది. కూతురు మృతితో తండ్రి నర్సింహ బోరున విలపిస్తున్నాడు. కాగా, ఆత్మహత్య చేసుకున్న యాదయ్య మిత్రుడు ఫిరోజ్ ఖాన్ జాడ కనిపించడం లేదు. అతని అదృశ్యంపై తీవ్ర ఆందోళన వ్యక్తమవుతోంది.