తెలంగాణ: జానా రెడ్డి ఇల్లు ముట్టడి

హైదరాబాద్: మాజీ మంత్రి, కాంగ్రెసు సీనియర్ నాయకుడు కె. జానా రెడ్డి ఇంటిని తెలంగాణ ఆందోళనకారులు సోమవారం ఉదయం ముట్టడించారు. జై తెలంగాణ నినాదాలు చేస్తూ వారు ఆందోళనకు దిగారు. జానా రెడ్డికి వ్యతిరేకంగా కూడా నినాదాలు చేశారు. శాసనసభ సభ్యత్వానికి జానా రెడ్డి రాజీనామా చేయాలని వారు డిమాండ్ చేశారు. దీంతో పరిస్థితి ఉద్రిక్తంగా మారింది. తెలంగాణ రాష్ట్ర సాధన కోసం ప్రజాప్రతినిధులు రాజీనామాలు చేయాలని తెలంగాణ జెఎసి నాయకులు డిమాండ్ చేస్తున్నారు.

కాగా, ఇక బంద్ లకు స్వస్తి చెప్పాలని ఉస్మానియా విశ్వవిద్యాలయం విద్యార్థుల జెఎసి నిర్ణయం తీసుకుంది. ఉద్యమాన్ని శాంతియుతంగా నిర్వహించాలని కూడా నిర్ణయించుకుంది. కాగా, విశ్వవిద్యాలయం మావోయిస్టులు లేరని వైస్ చాన్సలర్ తిరుపతి రావు చెప్పారు. తన అనుమతి లేకుండా పోలీసులు క్యాంపస్ లోకి ప్రవేశించవద్దని ఆదేశించారు. ఆదివారం సాయంత్రం విద్యార్థుల జెఎసి శాంతియాత్ర నిర్వహించారు. ఆత్మహత్యలకు పాల్పడవద్దని, పోరాటం ద్వారా తెలంగాణ సాధించుకుందామని వారు ప్రతిజ్ఞ చేశారు.