చెరువులో మునిగి ముగ్గురు మృతి

వరంగల్: వరంగల్ జిల్లాలో మంగళవారం విషాద సంఘటన చోటు చేసుకుంది. వరంగల్ జిల్లాలోని హసన్ పర్తి మండలం ఎల్లాపూర్ గ్రామంలోని మూడు కుటుంబాల్లో విషాద ఛాయలు అలుముకున్నాయి. గ్రామానికి చెందిన మూడు కుటుంబాలకు చెందిన ముగ్గురు యువత చెరువులో మునిగి చనిపోయారు.

చెరువులో పడిన ఓ యువకుడిని వెలికి తీయడానికి అక్కడ బట్టలుతుకుతున్న రజిత అనే యువతి ప్రయత్నించింది. ఆమె నీళ్లలోకి జారిపోయింది. వారిద్దరిని కాపాడడానికి ప్రయత్నించిన యాకూబ్ అనే యువకుడు కూడా చెరువులో మునిగి చనిపోయాడు. పోలీసులు సంఘటనా స్థలానికి చేరుకుని శవాలను పోస్టుమార్టం నిమిత్తం ఆస్పత్రికి తరలించి, దర్యాప్తు చేపట్టారు. మూడు రోజుల క్రితం వరంగల్ జిల్లాలోని వేములపల్లి గ్రామంలో ఇటువంటి సంఘటనే చోటు చేసుకుంది.