మమతా బడ్జెట్ పై బాబు పెదవి విరుపు

హైదరాబాద్: పార్లమెంటులో మమతా బెనర్జీ బుధవారం ప్రతిపాదించిన రైల్వే బడ్జెట్ పై తెలుగుదేశం పార్టీ అధ్యక్షుడు నారా చంద్రబాబు నాయుడు పెదవి విరిచారు. రాష్టానికి మమతా బెనర్జీ అన్యాయమే చేశారని ఆయన బుధవారం మీడియా ప్రతినిధుల సమావేశంలో అన్నారు. సికింద్రాబాదుకు కోచ్ ఫ్యాక్టరీ అడిగితే వ్యాగన్ల ఫ్యాక్టరీ ఇచ్చి చేతులు దులుపుకున్నారని ఆయన విమర్శించారు. రైల్వే లైన్ల విషయంలో కూడా న్యాయం జరగలేదని, రాష్ట్ర ప్రభుత్వ తోడ్పాటుతో చేపట్టే లైన్లే సగానికి పైగా ఉన్నాయని ఆయన అన్నారు.

ఏ రాష్ట్రానికి చెందిన నేత రైల్వే మంత్రిగా ఉంటే ఆ రాష్ట్రానికే రైల్వే బడ్జెట్ లో ఎక్కువ మేలు జరుగుతోందని, మమతా బెనర్జీ కూడా తన సొంత రాష్ట్రం పశ్చిమ బెంగాల్ కే ఎక్కువ ప్రాధాన్యం ఇచ్చారని ఆయన అన్నారు. మన రాష్ట్రానికి మేలు జరగాలంటే మన రాష్ట్రానికి చెందిన నేత రైల్వే మంత్రిగా ఉండాల్సిన అవసరం ఏర్పడిందని, పరిస్థితి చూస్తే అలా అనిపిస్తోందని ఆయన అన్నారు.