అంతర్జాతీయ పర్యాటక కేంద్రంగా కొండవీడు

గుంటూరు: గుంటూరు నగరానికి 25 కిలోమీటర్ల దూరంలో ఉన్న కొండవీడును అంతర్జాతీయ పర్యాటక కేంద్రంగానేకాక గొప్ప ఆధ్యాత్మిక కేంద్రంగా అభివృద్ధి చేయనున్నట్లు ఇస్కాన్‌ సంస్థ రాష్ట్ర అధ్యక్షుడు సత్యగోపీనాథ్‌దాస్‌ చెప్పారు. ఇందులో భాగంగా కొండవీడు, కోట గ్రామాల్లో రూ 60 కోట్లతో రామాయణం, మహాభారత ఘట్టాలను తెలిపే శిల్పాలతో విశాల ప్రదర్శనశాలను ఏర్పాటు చేయనున్నట్లు తెలిపారు. కొండవీడు కోట ప్రాంతాన్ని బుధవారం ఆయనతోపాటు ఇస్కాన్‌ ప్రతి నిధులు దక్షిణభారత డివిజన్‌ కార్యదర్శి రాంమురారిదాస్‌, జిల్లా కోఆర్డినేటర్‌ బందినేని రామకృష్ణ సందర్శిం చారు. అంతర్జాతీయ ఆధ్యాత్మిక కేంద్రంగా రూపొందించే దిశ గా అధ్యయనం చేసేందుకు ఇక్కడికొచ్చినట్లు వారు తెలిపారు.

ఈ సందర్భంగా సత్యగోపీనాథ్‌దాస్‌ మా ట్లాడుతూ దేవతామూర్తుల విగ్రహాలు, సనాతన ధర్మాలను తెలిపే దృశ్యాలతో, చారిత్రక ఆధారాలతో మ్యూజియాన్ని ఏర్పాటుచేస్తామని తెలిపారు. ముందుగా కొండవీడు గ్రామానికి చేరుకుని పురాతన నరసింహస్వామి ఆలయాన్ని సందర్శించారు. కొండపైకి ఆంజనేయస్వామి విగ్రహాన్ని, వరహాల కొట్టు, నేతి కొట్టు, శివాలయాన్ని, ముత్యాలమ్మ, పుట్టాలమ్మ, వెదుళ్లచెరువును పరిశీలించారు. అనంతరం కోట గ్రామం వైపున ఉన్న మెట్లదారి నుంచి కిందికి దిగి గ్రామంలోని జెండాచెట్టు వద్ద కూర్చుని వారి అభిప్రాయాలు తెలుసుకున్నారు.

రెండు ఆలయాల నిర్మాణం..గిరిదుర్గంపై వేంకటేశ్వరస్వామి ఆలయాన్ని అధునాతన రీతిలో నిర్మించనున్నట్లు వారు తెలిపారు. కొండ దిగువున రాధాకృష్ణ ఆలయాన్ని రూపొందిస్తామని వెల్లడించారు.