బెజవాడ శివారులో కొత్త మావోల లోకం!

విజయవాడ: నగర శివారు ప్రాంతాలు, పెనమలూరు మండల పరిధిలో మళ్లీ మావోయిస్టు కదలికలు ప్రారంభమైనట్లు పోలీసులు అనుమానిస్తున్నారు. పెనమలూరు మండలంలోని కానూరుకు చెందిన 25 మంది యువకులు మావోల సానుభూతిపరులుగా పనిచేయడానికి సంసిద్ధత వ్యక్తం చేసినట్లు సమాచారం. వీరు మావోయిస్టు పార్టీకి అనుబంధంగా ఉండే ఒక సంఘంలో చురుగ్గా పనిచేయాలని నిశ్చయించారు. దీనికి సంబంధించి ఇటీవల గుంటూరు జిల్లాలో జరిగిన ఓ సమావేశానికి వీరంతా హాజరై సభ్యత్వం తీసుకున్నారని తెలుస్తోంది.

ఈ విషయం ఇంటెలిజెన్స్‌ వర్గాలకు తెలియడంతో బుధవారం పలువురు అధికారులు సభ్యత్వం తీసుకున్న యువకుల వివరాల కోసం విచారణ చేపట్టారు. ఇంటెలిజన్స్‌ విభాగానికి చెందిన ఇద్దరు సీఐలు, నలుగురు ఎస్సైలు కానూరులో పర్యటించారు. గతంలో కూడా మావోల సానుభూతి పరులు మండలంలో ఉన్నారు. 30 ఏళ్ల క్రితం పోలీసులకు, నక్సలైట్లకు జరిగిన దాడుల నేపథ్యంలో కొందరు గుంటూరు జిల్లా చోడవరంలో పది రోజుల పాటు తలదాచుకున్నారని గ్రామస్తులు తెలిపారు.