మన పాస్ వర్డ్ దేవుడి చేతిలో: చినజీయర్

యైటింక్లయిన్‌ కాలనీ: మానవుడి జీవి తం ఓ కంప్యూటరైతే, దాని పాస్‌వర్డ్‌ దైవం చేతు ల్లో ఉంటుందని త్రిదండి శ్రీమన్నారాయణ రామానుజ చిన జీయర్‌ స్వామి ఉద్బోధించారు. యైటింక్లయిన్‌కాలనీ శ్రీ వేంకటేశ్వరస్వామి రజతోత్సవాల్లో భాగంగా బుధవారం భక్తుల నుద్దేశించి ఆయన ప్రసంగించారు. మానవుడి జీవితాన్ని కంప్యూటర్‌ తో పోల్చుతూ ఎవరి పుణ్యం, పాపం వారి ఖాతాల్లోకే నేరుగా వెళ్తుందన్నారు. పుట్టిన ప్రతి ఒక్కరు ఏదోరోజు చనిపోక తప్పదని సామాన్యుడు, మాన్యులెవరూ దీనికి అతీతులు కారని చెప్పారు.

ట్రాఫిక్‌ రూల్స్‌ పాటిస్తే పోలీసులు ఎలా పట్టించుకోరో విష్ణునామ పారాయణం చేసిన వారి జోలికి యముడు రాడన్నారు. అతితెలివి వల్ల మనిషి తాను నాశనం అవుతూ ఇతరులను కూడా నాశనం చేస్తాడని తెలిపారు. ఆత్మ ప్రక్షాళన దిశగా దృష్టి సారించిన వారికే యోగ్యత లభిస్తుందన్నారు. ఈ పూజలకు వచ్చిన కేశోరాం సిమెంట్‌ అధినేత కేసీజైన్‌ను జీయర్‌ స్వామి ఆశీర్వదించగా, ఆర్జీ-1 సీజీఎం మనోహర్‌రావు, ఆర్జీ-2 జీఎం రాజేందర్‌రెడ్డి, ఆర్జీ-3 జీఎం నర్సింహారావు, సేఫ్టీ జీఎం వసంతకుమార్‌ పాల్గొన్నారు.