ఇంటి వివాదంలో దర్శకుడు తేజ

హైదరాబాద్: తెలుగు చలనచిత్ర దర్శకుడు తేజ ఇంటి వివాదంలో చిక్కుకున్నాడు. తనకు ఏడు కోట్లకు తేజ ఇంటిని అమ్మేసి తనకు అప్పగించడం లేదంటూ పద్మనాభరెడ్డి అనే వ్యక్తి హైదరాబాదులోని జూబిలీహిల్స్ పోలీసు స్టేషనులో ఫిర్యాదు చేశాడు. దీనిపై పోలీసులు దర్యాప్తు చేస్తున్నారు. అయితే, ఇదే సమయంలో తేజ నిర్మాత చదలవాడ శ్రీనివాస్ ను నిందిస్తున్నాడు.

చదలవాడ శ్రీనివాస్ తన ఇంటిపై దాడి చేయించాడని ఆయన ఆరోపించారు. తన ఇంటిని పిఆర్కే ప్రసాద్ కొంటానని చెప్పి అడ్వాన్స్ ఇచ్చాడని, అయితే తర్వాత మిగతా డబ్బులు ఇవ్వలేదని, చదలవాడ శ్రీనివాస్ తన ఇంటిలోని 40 వేల రూపాయల ఖరీదు చేసే ఫర్నీచర్ ను తీసికెళ్లాడని, ఇప్పుడు కనిపించడం లేదని తేజ అంటున్నాడు. ఈ వివాదానికి సంబంధించిన వార్తాకథనాన్ని ఒక తెలుగు టీవీ చానెల్ శుక్రవారం ప్రసారం చేసింది.