విశాఖ ఏర్ పోర్ట్ కు అంతర్జాతీయ శోభ

విశాఖపట్నం: విశాఖ విమానాశ్రయానికి అంతర్జాతీయ విమానాలు రప్పిస్తామని కేంద్రమంత్రి దగ్గుబాటి పురందేశ్వరి హామీ ఇచ్చారు. ఇక్కడి విమానాశ్రయంలో మంగళవారం జరిగిన విమానాశ్రయ అభివృద్ధి కమిటీ సమావేశంలో ఆమె మాట్లాడారు. ఉదయం ఎనిమిది నుంచి రాత్రి ఎనిమిది వరకూ పూర్తి సమయం విమానాశ్రయ నిర్వహణకు చర్యలు తీసుకుంటామన్నారు. మధ్యాహ్నం రెండు నుంచి సాయంత్రం ఐదులోపు కూడా విమానాలు ఇక్కడి నుంచి రాకపోకలు జరిగేలా చేస్తామని హామీ ఇచ్చారు.

ప్రయాణికులకు సదుపాయంగా రెస్టారెంట్‌, స్నేక్‌ బార్‌ ఏర్పాటు చేయాలని విమానాశ్రయ డైరెక్టర్‌ పట్టాభికి కోరారు. విమానాశ్రయం నుంచి జాతీయ రహదారి వరకూ నిర్మించిన రహదారిని వినియోగంలోకి తెస్తామని మంత్రి పేర్కొన్నారు. ఈ సమస్య పరిష్కారం కోసం హైవే అథారిటీతో చర్చిస్తామని తెలిపారు.

కలెక్టర్‌ శ్యామలరావు, నగర పోలీస్‌ కమిషనర్‌, అదనపు డైరెక్టర్‌ జనరల్‌ పోలీస్‌ నండూరి సాంబశివరావు, పశ్చిమ నియోజకవర్గ ఎమ్మెల్యే మళ్ల విజయప్రసాద్‌, ట్రాఫిక్‌ డీసీపీ విశ్వప్రసాద్, వివిధ ఎయిర్‌ లైన్స్‌ ప్రతినిధులు పాల్గొన్నారు.