న్యాయవిచారణ జరిపించాలి: కిషన్ రెడ్డి

హైదరాబాద్: హైదరాబాద్ పాతబస్తీ అల్లర్లపై న్యాయ విచారణ జరిపించాలని బిజెపి శాసనసభ్యుడు జి. కిషన్ రెడ్డి ప్రభుత్వాన్ని డిమాండ్ చేశారు. ఒక పథకం ప్రకారమే పాతబస్తీలో దాడులు జరిగాయని ఆయన సోమవారం మీడియా ప్రతినిధుల సమావేశంలో ఆరోపించారు. కాలనీని ఖాళీ చేయించేందుకు కుట్ర జరిగిందని ఆయన అన్నారు. వోటు బ్యాంకు రాజకీయాలతో కాంగ్రెసు ప్రభుత్వం మజ్లీస్ ను ప్రోత్సహిస్తోందని ఆయన విమర్శించారు. శాంతి నెలకొనేందుకు ప్రజలు సంయమనం పాటించాలని ఆయన కోరారు.

ఉద్దేశ్యపూర్వకంగానే మజ్లీస్ అల్లర్లను ప్రోత్సహించిందని ఆయన ఆరోపించారు. మజ్లీస్ ఆగడాలపై రాష్ట్ర ప్రభుత్వం నిమ్మకు నీరెత్తినట్లు వ్యవహరిస్తోందని ఆయన అన్నారు. పాతబస్తీ అల్లర్లపై న్యాయవిచారణ జరిపించి, బాధ్యులపై కఠినమైన చర్యలు తీసుకోవాలని ఆయన ప్రభుత్వాన్ని డిమాండ్ చేశారు.