హైదరాబాద్ పాతబస్తీ ప్రశాంతం

హైదరాబాద్: హైదరాబాద్ లోని పాతబస్తీలో పరిస్థితి అదుపులోనే ఉంది. పాతబస్తీలోని 17 పోలీసు స్టేషన్ల పరిధిలో నిరవధిక కర్ఫ్యూ అమలులో ఉంది. సోమవారం రాత్రి 7 గంటల నుంచి కర్ఫ్యూ కొనసాగుతోంది. మంగళవారం ఉదయం తొమ్మిదిన్నర గంటల వరకు కూడా ఏ విధమైన అవాంఛనీయ సంఘటనలు జరగలేదు. పరిస్థితి అదుపులోనే ఉన్నప్పటికీ ఉద్రిక్తత కొనసాగుతోంది. కర్ఫ్యూ అమలులో ఉన్న ప్రాంతాల్లోకి పాసులుంటే తప్ప ఎవరినీ పోలీసులు అనుతించడం లేదు.

పాతబస్తీలో భారీగా పోలీసులను మోహరించారు. కేంద్ర బలగాలు కూడా వచ్చాయి. హైదరాబాద్ నగర పోలీసు కమిషనర్ ఎకె ఖాన్ పాతబస్తీలో పర్యటిస్తూ పరిస్థితి ఎప్పటికప్పుడు అంచనా వేస్తున్నారు. రాష్ట్ర పోలీసు డైరెక్టర్ జనరల్ (డిజిపి) గిరీష్ కుమార్ కూడా హైదరాబాద్ పాతబస్తీలో పర్యటించారు. పాతబస్తీలోని ప్రతి గల్లీలో పోలీసులు కాపలా కాస్తున్నారు. ప్రజల అవసరాలు కనుక్కుంటూ తగిన సాయం అందజేస్తున్నారు. సోమవారం మధ్యాహ్నం నుంచి హైదరాబాద్ పాతబస్తీలో పెద్ద యెత్తున అల్లర్లు చెలరేగాయి. పరిస్థితిని గమనించి పోలీసులు కర్ఫ్యూ విధించారు.