కర్ఫ్యూ సడలింపు: వీధుల్లోకి ప్రజలు

హైదరాబాద్: హైదరాబాదులోని పాతబస్తీలో పోలీసులు గురువారం ఉదయం రెండు గంటల పాటు కర్ఫ్యూను సడలించారు. దీంతో ప్రజలు ఒక్కసారిగా వీధుల్లోకి వచ్చారు. నిత్యావసర సరుకుల కోసం వారు బయటకు వచ్చారు. ఈ సమయంలో ప్రజలకు నిత్యావసర సరుకులు అందుబాటులో ఉండేలా చూశారు. వాహనాలను పాతబస్తీ నయాపూల్ వద్ద పోలీసులు వాహనాలను నిలిపేశారు. పాతబస్తీలోని తొమ్మిది పోలీసు స్టేషన్లలో ఉదయం 8 గంటల నుంచి కర్ఫ్యూ సడలింపు ఇచ్చారు. ఈ విరామం పది గంటల వరకు ఉంటుంది. మరో 8 పోలీసు స్టేషన్ల పరిధిలో ఉదయం 11 గంటల నుంచి రెండు గంటల పాటు కర్ఫ్యూ సడలిస్తారు.

కాగా, రెండో విడత కర్ఫ్యూ విధించిన 8 పోలీసు స్టేషన్ల పరిధిలో సడలింపు ఉండదని హైదరాబాద్ పోలీసు కమిషనర్ ఎకె ఖాన్ చెప్పారు. మూడు రోజులుగా పాతబస్తీలో కర్ఫ్యూ అమలులో ఉండడంతో ప్రజలు నిత్యావసర సరుకుల కోసం తీవ్ర ఇబ్బందులకు గురయ్యారు. దీంతో బుధవారం ముఖ్యమంత్రి కె. రోశయ్య పరిస్థితిని సమీక్షించి తగిన చర్యలు తీసుకున్నారు. కర్ఫ్యూ అమలులో ఉన్న ప్రాంతాల్లో బుధవారం నుంచి ఇప్పటి వరకు ఏ విధమైన అవాంఛనీయ సంఘటనలు జరగలేదు. పరిస్థితి ప్రశాంతంగా ఉంది.