ఆస్తుల కేసులో లాలు దంపతులకు ఊరట

న్యూఢిల్లీ: ఆదాయానికి మించి ఆస్తులు కలిగి ఉన్నారనే కేసులో ఆర్జెడీ అధినే లాలు ప్రసాద్ యాదవ్, రబ్రీ దేవి దంపతులకు సుప్రీంకోర్టు నుంచి ఊరట లభించింది. వారిద్దరికి కేసు నుంచి విముక్తి కలిగించడాన్ని సవాల్ చేస్తూ బీహార్ ప్రభుత్వం దాఖలు చేసిన అపీల్ ను విచారణకు స్వీకరించాలనే పాట్నా హైకోర్టు నిర్ణయాన్ని సుప్రీంకోర్టు గురువారం తోసిపుచ్చింది.

సిబిఐ దర్యాప్తు చేసిన ఆదాయానికి మించిన ఆస్తుల కేసులో లాలూ దంపతులకు లభించిన విముక్తికి వ్యతిరేకంగా అపీల్ చేసే అధికారం బీహార్ ప్రభుత్వానికి లేదని ప్రధాన న్యాయమూర్తి కెజి బాలకృష్ణన్, జస్టిస్ ఆర్ఎం లోథాలతో కూడిన డివిజన్ బెంచ్ స్పష్టం చేసింది. సిబిఐకి మాత్రమే ఆ హక్కు ఉంటుందని తేల్చి చెప్పింది. శాసనసభ ఎన్నికలు సమీపిస్తున్న తరుణంలో సుప్రీంకోర్టు నిర్ణయం లాలూ, రబ్రీ దంపతులకు పెద్ద ఊరట.