పిలిస్తే చిరుతో కలిసి పర్యటన: లగడపాటి

తిరుపతి: ప్రజారాజ్యం అధినేత చిరంజీవి ఆహ్వానిస్తే పార్టీలకు అతీతంగా ఏ ప్రాంతంలో పర్యటించడానికైనా సిద్ధంగా ఉన్నానని విజయవాడ ఎంపీ లగడపాటి రాజగోపాల్‌ తెలిపారు. చిరంజీవి, రాజగోపాల్ సమైక్యవాదాన్ని విన్పిస్తున్న విషయం తెలిసిందే. రాష్ట్రం విడిపోతే రాజకీయాలలో ఉండబోనని అన్నారు. కేసీఆర్‌ వ్యాఖ్యలను శ్రీ కృష్ణకమిటీ పట్టించుకోవడం లేదని, కుల, మత, ప్రాంతీయ విద్వేషాలను రెచ్చగొడుతున్నవారిని రాజకీయాల నుంచి బహిష్కరించాలని ఆయన పేర్కొన్నారు.

సర్వాధికారాలతో కూడిన జిల్లా ప్రభుత్వాలు ఏర్పడేందుకు పోరాడాలని పిలుపునిచ్చారు. సమైక్యవాదం ఎప్పుడూ ఎన్నికల్లో బయటపడుతుందని, మైనార్టీ వాదం మాత్రం ఎగిసెగిసి పడుతూ బలంగా ఉన్నట్లు కనపడుతుందని పేర్కొన్నారు. తిరుపతిలో ఆదివారం జరిగిన సమైక్యాంధ్ర సదస్సు సందర్భంగా ఆయన విలేకరులతో మాట్లాడారు. రాష్ట్రాలు, జాతీయ సమైక్యతపై సదస్సు నిర్వహించామని ఆయన తెలిపారు.