గూఢచర్యంపై భారత దౌత్యవేత్త అరెస్టు

న్యూఢిల్లీ: ఇస్లామాబాద్ లో భారత దౌత్యవేత్తగా పనిచేస్తున్న మహిళను పోలీసులు అరెస్టు చేశారు. ఆమెను మాధురీ గుప్తాగా గుర్తించారు. భారత హై కమిషన్ కార్యాలయంలో ఆమె సెకండ్ సెక్రటరీ (ప్రెస్, ఇన్ ఫర్మేషన్)గా పని చేస్తున్నారు. ఆమె గ్రేడ్ బి ఐఎఫ్ ఎస్ ఆఫీసరుగా పనిచేస్తున్నారు. ఉర్దూ స్పెషలిస్టులుగా గత 30 ఏళ్లుగా విదేశాంగ మంత్రిత్వ శాఖలో పనిచేస్తున్నారు.

మాధురీ గుప్తా పాకిస్తాన్ కోసం గూఢచర్యం చేస్తున్నట్లు ఆరోపణలున్నాయి. సీనియర్ ఐఎస్ఐ అధికారి కింద ఆమె భారత వ్యూహాత్మక ప్రయోజనానికి చెందిన సమాచారాన్ని పాకిస్తాన్ కు చేరవేసినట్లు అనుమానిస్తున్నారు. నిఘా పెట్టి సమాచారం సేకరించి, తగిన సాక్ష్యాధారాలను ఉంచుకుని వలపన్ని ఆమెను పట్టుకున్నట్లు చెబుతున్నారు. 45 ఏళ్ల మాధురి పెళ్లి చేసుకోలేదు. గతవారం ఆమె న్యూఢిల్లీ వచ్చారు. ఢిల్లీలోని ఆమె స్వగృహంలో ఢిల్లీ ప్రత్యేక పోలీసులు ఆమెను అదుపులోకి తీసుకున్నారు.