అది మీడియా టెర్రరిజం: కేశవరావు

హైదరాబాద్: వార్తా కథనాలను కాంగ్రెసు సీనియర్ నాయకుడు కె. కేశవ రావు మీడియా టెర్రరిజంగా అభివర్ణించారు. ముఖ్యమంత్రి రోశయ్యకు, మంత్రి మండలి సభ్యులకు మధ్య విభేదాలు ఉన్నట్లు వచ్చిన వార్తలపై ఆయన శుక్రవారం ఆ విధంగా అభివర్ణించారు. ప్రతి విషయాన్ని మీడియా భూతద్దంలో చూపుతోందని, అది మీడియా టెర్రరిజమని ఆయన మీడియా ప్రతినిధులతో అన్నారు.

మంత్రి మండలి సభ్యులకు, ముఖ్యమంత్రికి మధ్య విభేదాలు మీడియా సృష్టేనని ఆయన అన్నారు. ముఖ్యమంత్రికి, మంత్రులకు మధ్య ఏ విధమైన విభేదాలు లేవని ఆయన స్పష్టం చేశారు. మంత్రి వర్గ సమావేశంలో గురువారం ముఖ్యమంత్రి మంత్రుల తీరుపై తీవ్రంగా మండిపడినట్లు వార్తలు వచ్చాయి. సాక్షి దినపత్రికలో వస్తున్న వార్తాకథనాలను మంత్రులు ఖండించకపోవడాన్ని ఆయన తప్పు పట్టినట్లు తెలుస్తోంది.