బ్రిటన్ లో 8 మంది భారత సంతతి అబ్యర్ధుల గెలుపు

లండన్‌: బ్రిటన్‌ పార్లమెంటుకు గురువారం జరిగిన ఎన్నికల్లో భారత సంతతి అభ్యర్థులు సత్తా చాటారు. గతంలో ఎన్నడూ లేని విధంగా ఎనిమిది మంది జయభేరి మోగించారు. వీరిలో వేలరీ వాజ్‌, ప్రీతీ పటేల్‌ అనే ఇద్దరు మహిళలున్నారు. భారత సంతతి మహిళలు గెలుపొందడం ఇదే తొలిసారి. లేబర్‌ పార్టీ అభ్యర్థిగా గెలిచిన వేలరీ మరో విజేత కీత్‌ వాజ్‌కు సోదరి.

పార్లమెంటులోని కామన్స్‌ సభలో ఏకకాలంలో సోదరీసోదరులు ప్రాతినిధ్యం వహిస్తుండడం కూడా ఇదే తొలిసారి. సిట్టింగ్‌ ఎంపీ అయిన కీత్‌ వాజ్‌ తాజా ఎన్నికల్లో లీసెస్టర్‌ ఈస్ట్‌ నియోజక వర్గం నుంచి లేబర్‌ పార్టీ అభ్యర్థిగా పోటీపడి వెయ్యి ఓట్ల మెజారిటీతో గెలిచారు. ఆయన ఎంపీగా గెలవడం ఇది ఆరోసారి. ప్రీతి పటేల్‌ కన్జర్వేటివ్‌ పార్టీ అభ్యర్థిగా విథామ్‌ నుంచి విజయం సాధించారు. మిగతా విజేతల్లో వీరేంద్ర శర్మ, మార్షా సింగ్‌, శైలేష్‌ వారా, పాల్‌ ఉప్పల్‌, పరంజిత్‌ ధాండా ఉన్నారు.