మహిళా నేతకూ తప్పని కట్నం వేధింపు

కొత్తపల్లి (తూగో జిల్లా): పెళ్లై 20 సంవత్సరాలు దాటినా వరకట్న దాహం తీరని ఓభర్త ప్రజాప్రతినిధిగా ఉన్న భార్యపై దాడిచేసి గాయపర్చిన ఉదంతాన్ని కొత్తపల్లి పోలీసులు వివరించారు. శ్రీరాంపురం శివారు మాతావారి పాలేనికి చెందిన మాతా విజయకుమారి శ్రీరాంపురానికి ఎంపీటీసీ సభ్యురాలిగా ఉన్నారు. ఇరవై సంవత్సరాల క్రితం మాతా సుబ్బారావుతో ఆమెకు పెళ్లైంది. వీరికి ఇద్దరు ఆడపిల్లలు, ఒక మగ బిడ్డ ఉన్నారు.

కొన్నాళ్ల క్రితం వీరికి చెందిన భూమి, ఇళ్లను ఎస్‌ఈజెడ్‌ యాజమాన్యం కొనుగోలు చేసింది. దీనికి సంబంధించిన సొమ్ముపై సర్వహక్కులు మాతా విజయకుమారివి కాగా ఆ సొమ్ము తనకు ఇవ్వాలంటూ భర్త సుబ్బారావు ఆమెను చిత్రహింసలకు గురిచేయడం ప్రారంభించాడు. ఆమెపై పలుమార్లు దాడికి కూడా పాల్పడ్డాడు.