తిరుపతిలో చంద్రబాబుకు అవమానం

హైదరాబాద్: తిరుమల శ్రీవారి సన్నిధిలో తెలుగుదేశం పార్టీ అధినేత చంద్రబాబు నాయుడుకు అవమానం జరిగింది. తుఫాను ప్రాంతాల్లో పర్యటించేందుకు ప్రకాశం జిల్లాకు వెళ్ళి శనివారం రాత్రి తిరుపతికి తిరిగివచ్చిన చంద్రబాబు నాయుడు స్థానిక పద్మావతి అతిథి గృహంలో బస చేసేందుకు అక్కడికి వెళ్ళారు. శుక్రవారమే చంద్రబాబు తిరుపతికి వస్తున్న విషయాన్ని ఆయన అంతరంగిక కార్యదర్శి తిరుమల తిరుపతి దేవస్థానం అధికారులకు సమాచారం అందించి వసతి గృహాన్ని అందుబాటులో ఉంచాలని కోరారు. శనివారం అర్ధరాత్రి ఒకటిన్నర ప్రాంతంలో చంద్రబాబు పద్మావతి అతిథి గృహానికి వెళ్ళగా ఇందులో గదులు అందుబాటులో లేవంటూ సమాధానమిచ్చారు.

మామూలుగా తిరుపతి వెళితే చంద్రబాబు పద్మావతి అతిథి గృహంలో బస చేయడం సంప్రదాయం. ముఖ్యమంత్రిగా ఉన్న సమయంలోనూ, ప్రతిపక్ష నేతగా కూడా తిరుపతి వెళితే చంద్రబాబు ఈ అతిథి గృహంలోనే బస చేసేవారు. ఇదే క్రమంలో శనివారం కూడా అతిథి గృహానికి వెళ్ళగా అక్కడ అధికారులు ఆయనకు రిక్తహస్తాలు చూపించారు.చేసేదేమీ లేక స్థానిక కెన్సెస్‌ ఫార్చూన్‌ హోటల్‌కు వెళ్ళి సేద తిరారు. గతంలోనూ చంద్రబాబుకు తిరుమలలో అతిథి గృహం కేటాయించకుండా అధికారులు అవమానపరిచారు.