ప్రజారాజ్యాన్ని కాంగ్రెసులో విలీనం చేయం: చిరంజీవి

హైదరాబాద్: తమ పార్టీని కాంగ్రెసులో విలీనం చేయబోమని ప్రజారాజ్యం పార్టీ అధ్యక్షుడు చిరంజీవి స్పష్టం చేశారు. కాంగ్రెసు అధ్యక్షురాలు సోనియా గాంధీతో చర్చల కోసం శనివారం ఢిల్లీకి బయలుదేరే ముందు ఆయన మీడియా ప్రతినిధులతో మాట్లాడారు. కాంగ్రెసులో ప్రజారాజ్యం పార్టీ విలీనమవుతుందనే ప్రచారంలో వాస్తవం లేదని ఆయన అన్నారు. రాజ్యసభ ఎన్నికలపై సోనియాతో చర్చల కోసమే ఢిల్లీ వెళ్తున్నట్లు ఆయన తెలిపారు.

జగన్ తమను ధిక్కరించి ఓదార్పు యాత్రకు దిగిన నేపథ్యంలో చర్చల కోసం సోనియా గాంధీ చర్చల కోసం చిరంజీవిని ఢిల్లీకి ఆహ్వానించారు. ప్రజారాజ్యం పార్టీకి ఒక రాజ్యసభ సీటును కాంగ్రెసు ఇచ్చే అవకాశం ఉంది. దీనిపై సోనియాతో చిరంజీవి చర్చలు జరుపుతారు. దానికితోడు, కాంగ్రెసుతో మిత్రపక్షంగా కొనసాగేందుకు అవసరమైన ఏర్పాట్లు కూడా చేసుకుంటారని చెబుతున్నారు. వచ్చే స్థానిక సంస్థల ఎన్నికలతో పాటు అన్ని వేళలా మిత్రపక్షంగా ఉండేందుకు చిరంజీవి సిద్ధపడినట్లు చెబుతున్నారు.