కాంగ్రెసు చిరు పార్టీ విలీనమవుతుంది: చంద్రబాబు నాయుడు

హైదరాబాద్: చిరంజీవి నాయకత్వంలోని ప్రజారాజ్యం పార్టీ కాంగ్రెసులో విలీనానికి సిద్ధమవుతోందని తెలుగుదేశం పార్టీ అధ్యక్షుడు నారా చంద్రబాబు నాయుడు అన్నారు. తెలంగాణ రాష్ట్ర సమితి (తెరాస) కూడా అదే పరిస్థితిలో ఉందని ఆయన సోమవారం మీడియా ప్రతినిధుల సమావేశంలో అన్నారు. కాంగ్రెసుతో కలిసి పనిచేస్తామని తెరాస నాయకులు అంటున్నారని ఆయన అన్నారు. ఈ స్థితిలో రాష్ట్రంలో కాంగ్రెసు పార్టీకి తమ పార్టీయే ప్రత్యామ్నాయమని ఆయన అన్నారు. పార్టీ వదిలి వెళ్లిపోయినవారిని తిరిగి పార్టీలోకి ఆహ్వానిస్తున్నట్లు ఆయన తెలిపారు.

రాష్ట్ర ప్రభుత్వానికి మద్యం షాపుల వేలం ద్వారా డబ్బులు సంపాదించాలన్న ఆలోచన తప్ప రైతు సమస్యలు పట్టడం లేదని ఆయన విమర్శించారు. డబ్బుకు బానిసగా మారి మద్యం ధరల నిర్ణయాధికారాన్ని వ్యాపారులకు అప్పగించిందని ఆయన అన్నారు. చేత గాని అసమర్థ పాలన వల్ల రాష్ట్రానికి పెట్టుబడులు రావడం లేదని ఆయన వ్యాఖ్యానించారు.