ఓదార్పు యాత్రపై నేడో రేపో వైయస్ జగన్ బహిరంగ లేఖ

హైదరాబాద్: శ్రీకాకుళం జిల్లాలో ఓదార్పు యాత్ర వాయిదాపై కాంగ్రెసు కడప పార్లమెంటు సభ్యుడు బహిరంగ లేఖ రాసే అవకాశం ఉంది. నేడో రేపో ఆయన ఈ బహిరంగ లేఖను మీడియా సంస్థలకు విడుదల చేస్తారని అంటున్నారు. తాను ఓదార్పు యాత్రను ఎందుకు వాయిదా వేసుకున్నది ఆ లేఖలో ఆయన వివరిస్తారని చెబుతున్నారు. తన తండ్రి వైయస్ రాజశేఖర రెడ్డి ఆకస్మిక మృతికి మనస్తాపానికి గురై మరణించినవారి కుటుంబాలను తాను పరామర్శించడానికి ఎంతగా ఆతురత చెందుతున్నదీ ఆయన ఆ లేఖలో చెప్తారు.

పార్టీ అధిష్టానం నిర్ణయాన్ని శిరసా వహించాలనే ఉద్దేశంతోనే తాను ఓదార్పు యాత్రను వాయిదా వేసుకుంటున్నట్లు ఆయన ఆ లేఖలో ప్రజలకు తెలియజేస్తారని సమాచారం. అయితే, బాధితులను పరామర్శించకుండా తనను ఎవరూ ఆపలేరని, వారిని పరామర్సించడం తన బాధ్యత అని చెప్పే అవకాశాలున్నాయి. ఓదార్పు యాత్ర చేపట్టకుండా అడ్డుపడుతున్న శక్తుల గురించి కూడా ఆయన చెప్పవచ్చు.