వర్షాలతో ముంబై అతలాకుతలం: 8 మంది మృతి

ముంబై: భారీ వర్షాలతో మహారాష్ట్ర రాజధాని ముంబై బుధవారం అతలాకుతలమైంది. సాధారణ జనజీవనం స్తంభించింది. ముంబై నగరం జలమయమైంది. భారీ వర్షాలు కురవడంతో పాటు గాలులు కూడా వీస్తున్నాయి. రైళ్లు ఆలస్యంగా నడుస్తున్నాయి. వర్షాల ప్రభావం విమానాల రాకపోకలపై కూడా ప్రభావం చూపింది. విమానాల రాకపోకల్లో గంటన్నర నుంచి రెండు గంటలు జాప్యం జరుగుతోంది. ఎయిర్ ఇండియా చెన్నై విమానంతో పాటు ఐదు విమానాలను దారి మళ్లించారు. మధ్య ముంబైలోని దాదర్, కాడ్బరీ జంక్షన్, హింద్ మాతా, తదితర ప్రాంతాలు జలమయమైంది.

కాగా, థానేలో గోడ కూలి ఎనమండుగురు మరణించారు. ఈ సంఘటన బుధవారం తెల్లవారు జామున నాలుగున్నర గంటల ప్రాంతంలో జరిగింది. నిద్రలో ఉండగా గోడ కూలింది. దాంతో వారు శిథిలాల కింద నిద్రలోని మృత్యుముఖంలోకి జారుకున్నారు. సహాయక చర్యలు సాగుతున్నాయి. మహారాష్ట్రలో గత వారం రోజులుగా వర్షాలకు సంబంధించిన మరణాలు 40 సంభవించాయి.