కంప్యూటర్ల దొంగగా మారిన హైదరాబాద్ టెక్కీ

హైదరాబాద్: అతను లండన్ లోని ఓ ప్రతిష్టాత్మకమైన కళాశాల నుంచి ఎంఎస్ డిగ్రీ తీసుకున్నాడు. పగలంతా ఇంటర్నెట్ మీద గడుపుతాడు. రాత్రి కాగానే దొంగగా మారి కంప్యూటర్లను ఎత్తుకెళ్తాడు. తాను ఇంటర్నెట్ సర్ఫ్ చేసిన సైబర్ కేఫ్ నుంచి వాటిని దొంగిలిస్తాడు. తాను దొంగిలించిన కంప్యూటర్లను హైదరాబాదులోని అమీర్ పేటలో గల మైత్రీవనంలో విక్రయిస్తుండగా జూబిలీ హిల్స్ పోలీసులతో కలిసి సంజీవ రెడ్డి నగర్ పోలీసులు ప్రశాంత్ కుమార్ అనే ఆ దొంగను పట్టుకున్నారు.

లండన్ లోని ఇంటర్నెట్ స్కూల్లో ఎంఎస్ పూర్తి చేసిన ప్రశాంత్ కుమార్ 2006లో హైదరాబాద్ తిరిగి వచ్చి ఎర్రమంజిల్ కాలనీలోని అనురాగ్ అపార్టుమెంటులో ఉంటున్నాడు. అయితే అతనికి తగిన ఉద్యోగం లభించలేదు. దీంతో సమయం గడపడానికి సైబర్ కేఫ్ లకు వెళ్లడం అలవాటు చేసుకున్నాడు. అయితే ఖర్చులకు డబ్బులు లేకపోవడం కంప్యూటర్లను దొంగిలించి అమ్ముకోవడం ప్రారంభించాడని పోలీసులు చెప్పారు. హైదరాబాద్, సైబరాబాదుల్లో ప్రశాంత్ కుమార్ 13 నేరాలకు పాల్పడినట్లు పోలీసు అధికారి నాగేశ్వర రావు చెప్పారు. అతని నుంచి పోలీసులు 44 కంప్యూటర్లు, మూడు ప్రింటర్లు స్వాధీనం చేసుకున్నారు.