లాహోర్ సూఫీ మసీదులో పేలుళ్లు: 41 మంది మృతి

లాహోర్: మూడు శక్తివంతమైన పేలుళ్లతో పాకిస్థాన్ తూర్పు ప్రాంత నగరమైన లాహోర్ దద్దరిల్లింది. ఈ పేలుళ్లలో 41 మంది చనిపోయినట్లు సహాయ చర్యల్లో పాల్గొంటున్నవారు తెలిపారు. దాదాపు 120 మంది గాయపడ్డారు. ప్రఖ్యాత దాతా దర్బార్ మందిరంలో గురువారం రాత్రి ఈ దారుణం జరిగింది.

ప్రార్థనా మందిరంలోని పార్కింగ్ ప్రాంతంలో, సూఫీ మందిరం బేస్‌మెంట్ వద్ద పేలుళ్లు జరిగాయి. ప్రార్థనల కోసం స్థానికులు మందిరంలోకి ప్రవేశిస్తున్న సమయంలో పేలుళ్లు జరగడంతో మృతుల సంఖ్య ఎక్కువగా ఉంది. ఇది ఆత్మాహుతి బాంబర్ల పనేనని అధికారులను ఉటంకిస్తూ జియో న్యూస్ చానల్ పేర్కొంది. మృతదేహాలు మసీదు ఆవరణలో చెల్లాచెదురుగా పడ్డాయి.