వైయస్ జగన్ కోసం ప్రాణాలైనా ఇస్తాం: ఎమ్మెల్యే గుర్నాథ్ రెడ్డి

అనంతపురం‌: దివంగత నేత వైయస్ రాజశేఖర రెడ్డి తనయుడు, కడప పార్లమెంటు సభ్యుడు వైయస్ జగన్ కోసం ప్రాణాలు ఇచ్చేందుకు కూడా తాము సిద్ధంగా ఉన్నామని కాంగ్రెసు అనంతపురం శాసనసభ్యుడు గుర్నాథ్ రెడ్డి అన్నారు. తమ పార్టీ అధ్యక్షురాలు సోనియా గాంధీ ఆశీస్సులతో జగన్ ఏనాటికైనా ముఖ్యమంత్రి అవుతారని ఆయన సోమవారం మీడియా ప్రతినిధుల సమావేశంలో అన్నారు.

దివంగత నేత వైయస్ రాజశేఖర రెడ్డి జయంతి రోజు ఈ నెల 8వ తేదీన శాసనసభా సమావేశాలు జరుగుతున్నాయని తాము బాధపడుతున్నట్లు ఆయన తెలిపారు. ఈ విషయంపై ప్రశ్నిస్తే ముఖ్యమంత్రి, మంత్రివర్గం తీసుకున్న నిర్ణయమని ప్రభుత్వ పెద్దలు అంటున్నారని ఆయన అన్నారు. శాసనసభా సమావేశాల కన్నా తమకు వైయస్ జయంతి ముఖ్యమని ఆయన అన్నారు.