తెలంగాణ ఉప ఎన్నికల్లో ప్రచారానికి చంద్రబాబు రెడీ

హైదరాబాద్: తెలంగాణలోని 12 శాసనసభా నియోజకవర్గాలకు జరుగుతున్న ఉప ఎన్నికల్లో తెలుగుదేశం పార్టీ అధ్యక్షుడు నారా చంద్రబాబు నాయుడు ప్రచారం చేయనున్నారు. ఈ విషయాన్ని ఆయన మంగళవారం మీడియా ప్రతినిధుల సమావేశంలో చెప్పారు. ఉప ఎన్నికల మిషతో శాసనసభా సమావేశాలను కుదించడం బాధాకరమని ఆయన అన్నారు. రాష్ట్ర ప్రజలు ఎదుర్కుంటున్న సమస్యలపై చర్చించడానికి శాసనసభా సమావేశాలు ఎక్కువ రోజులు జరగడం అవసరమని ఆయన అభిప్రాయపడ్డారు.

మద్యం, ఫీజుల రీయంబర్స్ మెంటు విషయాల్లో ప్రభుత్వం కపట నాటకం ఆడుతోందని ఆయన అన్నారు. మద్యం షాపులకు అనుమతి ఇచ్చే విషయంలో ప్రభుత్వమే చట్టాన్ని ఉల్లంఘిస్తోందని ఆయన విమర్శించారు. ప్రార్థనా స్థలాలకు, విద్యాసంస్థలకు సమీపంలో మద్యం దుకాణాలు ఉండకూడదనే నిబంధనను ప్రభుత్వం తుంగలో తొక్కిందని ఆయన విమర్శించారు. మహారాష్ట్ర ప్రభుత్వం గోదావరి నదిపై నిర్మిస్తున్న బాబ్లీతో పాటు ఇతర ప్రాజెక్టులను ఆపించడంలో రాష్ట్ర ప్రభుత్వం విఫలమైందని ఆయన అన్నారు. పెట్రో ఉత్పత్తుల ధరలను పెంచి ప్రభుత్వం సామాన్యులపై పెను భారం మోపిందని, నిత్యావసర సరుకుల ధరలను అదుపు చేయడంలో ప్రభుత్వం విఫలమైందని ఆయన అన్నారు.