అధిష్టానంతో పెట్టుకుంటే వైయస్ జగన్ జీరో అవుతారు: కాంగ్రెసు సీనియర్లు

హైదరాబాద్: పార్టీ అధిష్టానంతో పెట్టుకుంటే కడప పార్లమెంటు సభ్యుడు వైయస్ జగన్ జీరో కావడం ఖాయమని కాంగ్రెసు తెలంగాణ సీనియర్లు అభిప్రాయపడ్డారు. అధిష్టానం అనుమతి లేకుండా జగన్ ఓదార్పు యాత్ర చేపట్టడం సమంజసం కాదని కాంగ్రెసు సీనియర్ నేత పాల్వాయి గోవర్దన్ రెడ్డి మంగళవారం మీడియా ప్రతినిధులతో అన్నారు. జగన్ కు భవిష్యత్తు ఉందని, జగన్ చిన్నవాడు, అనుభవం లేదు కాబట్టి కొన్ని వివాదాలకు తావు ఇస్తున్నాడని, అధిష్టానం మాట వింటేనే జగన్ కు భవిష్యత్తు ఉంటుందని ఆయన అన్నారు.

ఎంత పెద్ద నాయకుడైనా, కార్యకర్త అయినా పార్టీ అధిష్టానం మాట వినాల్సిందేనని కాంగ్రెసు సీనియర్ శాసనసభ్యుడు ఆర్. దామోదర్ రెడ్డి అన్నారు. గతంలో జలగం వెంగళరావు, మర్రి చెన్నారెడ్డి పార్టీ అధిష్టానాన్ని ధిక్కరించి ఏమీ కాకుండా పోయారని, అధిష్టానాన్ని ధిక్కరిస్తే జగన్ కు కూడా అదే గతి పడుతుందని ఆయన మీడియా ప్రతినిధులతో అన్నారు. పార్టీ అధిష్టానంతో పెట్టుకుంటే జగన్ కు భవిష్యత్తు ఉండదని ఆయన అన్నారు.