సోంపేట ఘటనపై తీవ్ర దుమారం: టిడిపి ఎమ్మెల్యేల సస్పెన్షన్

హైదరాబాద్‌: సోంపేట ఘటనపై గురువారం శాసనసభలో తీవ్ర దుమారం చెలరేగింది. మంత్రి రెవెన్యూ మంత్రిని బర్తరఫ్ చేయాలని డిమాండ్ చేస్తూ తెలుగుదేశం సభ్యులు ఆందోళనకు దిగారు. ధర్మాన ప్రసాదరావు ప్రసంగాన్ని అడ్డుకున్నారు. స్పీకర్ పోడియాన్ని చుట్టు ముట్టి సభా కార్యక్రమాలను అడ్డుకున్నారు. పోడియం వైపు మైకులు విసిరేశారు. దీంతో తెలుగుదేశం సభ్యులను స్పీకర్ కిరణ్ కుమార్ రెడ్డి ఒక రోజు పాటు సభ నుంచి సస్పెండ్ చేశారు.

అంతకు ముందు సోంపేట ఘటనపై పలుమార్లు వాయిదా పడిన సభ తిరిగి ప్రారంభం కాగానే ఈ ఘటనపై మంత్రి ధర్మాన ప్రసాదరావు మాట్లాడేందుకు ప్రయత్నించారు. అయితే మంత్రి ప్రసంగాన్ని అడ్డుకుంటూ స్పీకర్‌ పోడియాన్ని విపక్ష సభ్యులు చుట్టుముట్టారు. ధర్మాన రాజీనామా చేయాలని డిమాండ్‌ చేశారు. ఎవరి పేరు చెప్తే వారిని తొలగించడానికి తాను సిద్ధంగా లేనని ముఖ్యమంత్రి రోశయ్య చెప్పారు.

సస్పెండ్ అయిన సభ్యులు సభను వెళ్లకపోవడంతో మార్షల్ రంగంలోకి దిగారు. మార్షల్స్ వారిని బయటకు గెంటివేశారు. ఆ తర్వాత తెలుగుదేశం సభ్యులు ముఖ్యమంత్రి ఛేంబర్ వద్ద ధర్నాకు దిగారు. అక్కడి నుంచి కూడా వారిని మార్షల్స్ చేత తొలగించేందుకు ప్రయత్నాలు జరుగుతున్నాయి.