తెలుగుదేశం బాబ్లీ పోరుకు కోదండరామ్ మద్దతు

కరీంనగర్‌: గోదావరి నదిపై మహారాష్ట్ర ప్రభుత్వం అక్రమంగా నిర్మిస్తున్న బాబ్లీ, తదితర ప్రాజెక్టులకు వ్యతిరేకంగా చేపట్టిన ఆందోళనకు తెలంగాణ ఐక్య కార్యాచరణ కమిటీ (జెఎసి) కన్వీనర్ కోదండరామ్ మద్దతు ప్రకటించారు. తెలంగాణా అభివృద్ధికి తెలుగుదేశం చేస్తున్న బాబ్లీ పోరాటం మంచిదేనని అభిప్రాయపడ్డారు. బాబ్లీ అంశంపై తెదేపా చేస్తున్న పోరాటానికి దీర్ఘకాలిక ప్రాముఖ్యం ఇవ్వాలని ఆయన శనివారం మీడియా ప్రతినిధుల సమావేశంలో అన్నారు. సమస్య పరిష్కారానికి సీనియర్‌ ఇంజినీర్ల ఆలోచనలు పరిగణనలోకి తీసుకోవాలని కోరారు.

ప్రభుత్వం బాబ్లీపై అనుసరించిన విధానంపై శ్వేతపత్రం విడుదల చేయాలని కోదండరామ్ డిమాండ్‌ చేశారు. ఈనెల 23న ప్రధాని వద్దకు వెళ్లేముందు అఖిలపక్ష భేటీని ప్రభుత్వం ఏర్పాటుచేయాలన్నారు. ప్రభుత్వానికి పోలవరంపై ఉన్న శ్రద్ధ బాబ్లీపై లేదని విమర్శించారు. పోలవరం విషయంలో నీటి పారుదల శాఖ ఉన్నతాధికారులను హుటాహుటిన పంపే ప్రభుత్వం ఇతర ప్రాజెక్టుల విషయంలో నిర్లక్ష్యం వహిస్తోందని ఆయన విమర్శించారు.