భూమిని కాపాడుకుంటాం, అవసరమైతే దీక్ష చేస్తాం: మురళీమోహన్

హైదరాబాద్: ప్రైవేట్ వ్యక్తులకు కట్టబెట్టిన చలన చిత్రాభివృద్ధి సంస్థ (ఎఫ్టీసి) భూమిని కాపాడుకుంటామని, అవసరమైతే నిరాహార దీక్ష చేస్తామని మూవీ ఆర్టిస్టుల సంఘం (మా) అధ్యక్షుడు మురళీమోహన్ చెప్పారు. హైదరాబాదులోని ఫిల్మ్ నగర్ లో ఎఫ్డీసి భూముల స్వాధీనానికి జారీ చేసిన జీవోను రద్దు చేయాలని కోరుతూ సినీ ప్రముఖులు, కార్మికులు శనివారం ఉదయం హైదరాబాద్ లోని ఎఫ్డీసి స్థలం వద్ద ధర్నాకు దిగారు. రియల్టర్లకు అప్పగించడానికి ప్రభుత్వం కుట్ర చేస్తోందని మురళీమోహన్ విమర్శించారు.

జీవోను రద్దు చేసే వరకు ఆందోళన చేస్తామని ఆయన చెప్పారు. సినీ ప్రముఖులు, కార్మికుల ఆందోళన నేపథ్యంలో ముఖ్యమంత్రి కె. రోశయ్య మురళీమోహన్ ను చర్చలకు ఆహ్వానించారు. ఆ స్థలంలో భూమి పూజ చేస్తారని తెలియడంతో తెలుగు సినీ పరిశ్రమ అక్కడికి తరలి వచ్చింది. భూమి పూజను అడ్డుకోవడానికి వారు సిద్ధపడ్డారు.