బాబ్లీపై ప్రధానికి డెడ్ లైన్ పెట్టిన చంద్రబాబు నాయుడు

న్యూఢిల్లీ: మహారాష్ట్ర ప్రభుత్వం గోదావరి నదిపై అక్రమంగా నిర్మిస్తున్న బాబ్లీ సమస్య పరిష్కారానికి ప్రధాని మన్మోహన్ సింగ్ కు తెలుగుదేశం పార్టీ అధ్యక్షుడు నారా చంద్రబాబు నాయుడు డెడ్ లైన్ పెట్టారు. బాబ్లీ సమస్యపై ప్రధాని జోక్యం చేసుకుని 15 రోజుల్లో పరిష్కరించాలని ఆయన మంగళవారం మీడియా ప్రతినిధుల సమావేశంలో డిమాండ్‌ చేశారు. బాబ్లీ సమస్యను పరిస్కరించకపోతే ప్రజా పోరాటాన్ని ఉథృతం చేస్తామన్నారు. బాబ్లీని ధ్వంసం చేయడమొక్కటే మార్గమని ఆయన అన్నారు. బాబ్లీని ఆపించకపోతే కాంగ్రెసు ప్రభుత్వం రాష్ట్ర రైతుల ఆగ్రహాన్ని చవి చూడాల్సి వస్తుందని ఆయన అన్నారు.

విపక్షాల చెప్పిన విషయాలన్నీ విని కూడా ప్రధాని సరిగా స్పందించకపోవటాన్ని ఆయన తప్పుపట్టారు. రాష్ట్ర సరిహద్దుల్లో మహారాష్ట్ర పోలీసులు తమపై దౌర్జన్యం చేస్తే ఖండించలేని ముఖ్యమంత్రి రాష్ట్రానికేం న్యాయం చేస్తారని అన్నారు. మహారాష్ట్ర ప్రభుత్వం అక్రమంగా నిర్మించిన ప్రాజెక్టుల ద్వారా మనకు రావాల్సిన నీటిని మళ్లిస్తోందని ఆయన అన్నారు. బాబ్లీ పూర్తయితే శ్రీరాంసాగర్ ప్రాజెక్టు ఎండిపోవడం ఖాయమని ఆయన అన్నారు. బాబ్లీని ఆపించడానికి తాము ఎంత దూరమైనా వెళ్తామని ఆయన చెప్పారు.