చంద్రబాబు నాయుడు తిరుమల యాత్రపై నరసింహన్ వ్యంగ్యాస్త్రం

న్యూఢిల్లీ: తెలుగుదేశం పార్టీ అధ్యక్షుడు నారా చంద్రబాబు నాయుడి తిరుమల యాత్రపై రాష్ట్ర గవర్నర్ నరసింహన్ వ్యంగ్యాస్త్రం విసిరారు. చంద్రబాబు తిరుమల యాత్రపై మీడియా ప్రతినిధులు ప్రస్తావించగా భక్తి చేస్తే మంచిదే కదా అని ఆనయ వ్యాఖ్యానించారు. తిరుమల తిరుపతి దేవస్థానం (టిటిడి) అక్రమాలపై సిబిఐ విచారణకు ఆదేశించబోమని ఆయన సోమవారం చెప్పారు. రాష్ట్ర ప్రభుత్వం విచారణ జరిపిస్తుందని ఆయన అన్నారు. సిబిఐకి మరో పని లేదా అని ఆయన ప్రశ్నించారు. టిటిడి మాజీ చైర్మన్ కరుణాకర్ రెడ్డి తనను కలవలేదని ఆయన చెప్పారు. కరుణాకర్ రెడ్డి అపాయింట్ అడిగాడని చెప్పిన ఆయన కరుణాకర్ రెడ్డి తనను కలిసినట్లు గుర్తు లేదని చెప్పారు.

వైయస్ జగన్ తదుపరి ఓదార్పు యాత్ర సందర్భంగా శాంతిభద్రతలపై ప్రశ్నించగా రాష్ట్రంలో శాంతిభద్రతలు బాగానే ఉన్నాయని ఆయన చెప్పారు. రాష్ట్ర ప్రభుత్వ పాలన బాగుందని, రాష్ట్రంలో శాంతిభద్రతల పరిస్థితి బాగుందని ఆయన చెప్పారు. శ్రీకృష్ణ దేవరాయల విశ్వవిద్యాలయం వైస్ చాన్సలర్ గా కుసుమ కుమారిని తొలగించడంలో రాజకీయం లేదని, అందులో తన బాధ్యతను తాను నిర్వహించానని ఆయన చెప్పారు. విద్యారంగంలో రాజకీయాలు చేస్తే సహించబోమని ఆయన చెప్పారు. కుసుమకుమారి హైకోర్టుకు వెళ్లిన విషయాన్ని ఆయన గుర్తు చేశారు.