చిరంజీవి మద్దతిస్తే తీసుకుంటాం: సిఎం రోశయ్య

ఒంగోలు: ప్రజారాజ్యం అధ్యక్షుడు చిరంజీవి చేసిన మద్దతు ప్రకటనను ముఖ్యమంత్రి రోశయ్య స్వాగతించారు. రాష్ట్రంలో కాంగ్రెస్ ప్రభుత్వానికి ఎలాంటి ముప్పు లేదని ధీమా వ్యక్తం చేశారు. ఆదివారం ప్రకాశం జిల్లా చీరాల ఐటీసీ అతిథి గృహంలో జిల్లాకు చెందిన ప్రజా ప్రతినిధులు, అధికారులతో ప్రభుత్వ పథకాలపై రోశయ్య సమీక్ష చేసిన తర్వాత ఆయన మీడియా ప్రతినిధులతో మాట్లాడారు. కాంగ్రెస్ ప్రభుత్వానికి ఎలాంటి ఢోకా లేదని, ప్రభుత్వం స్థిరంగానే ఉందని, రాష్ట్రంలో కాంగ్రెస్ ప్రభుత్వం కొనసాగాలన్న ఆకాంక్షతో చిరంజీవి మద్దతు ఇస్తానంటే స్వాగతిస్తామని రోశయ్య తెలిపారు. జగన్ ఓదార్పు యాత్రతో రాష్ట్ర ప్రభుత్వానికి సంబంధం లేదన్నారు.

జగన్ యాత్రలో పాల్గొనాలా, వద్దా అనే సందేహం ఉన్న కాంగ్రెస్ ప్రజా ప్రతినిధులు పార్టీని సంప్రదించి తమ అనుమానాలను నివృత్తి చేసుకోవచ్చని తెలిపారు. తెలంగాణ సమస్య ఇప్పటిది కాదని రోశయ్య పేర్కొన్నారు. సమస్య ఉన్నందునే కేంద్ర ప్రభుత్వం జస్టిస్ శ్రీకృష్ణ కమిటీని నియమించిందని చెప్పారు. ఆ కమిటీ నివేదిక ఆధారంగా కేంద్రం తీసుకునే నిర్ణయానికి తాము కట్టుబడి ఉంటామన్నారు. మునిసిపల్ ఎన్నికలను షెడ్యూల్ ప్రకారం నిర్వహించాల్సిన అవసరం ఉందన్నారు. అయితే, మహిళలకు 50శాతం రిజర్వేషన్ల కేటాయింపు అంశంపై విస్తృతంగా చర్చించి తుది నిర్ణయం తీసుకోవాల్సి ఉంటుందని చెప్పారు. ప్రతిపక్ష నేతగా ప్రజాసమస్యలపై పోరాడే స్వేచ్ఛ చంద్రబాబుకు ఉందని రోశయ్య పేర్కొన్నారు.