రాజశేఖర్, జీవిత దంపతులకు చిరంజీవి కౌంటర్

హైదరాబాద్: అభిమానుల రక్తం అమ్ముకుంటున్నారనే సినీ నటుడు రాజశేఖర్, జీవిత దంపతుల ఆరోపణలపై ప్రజారాజ్యం పార్టీ అధ్యక్షుడు చిరంజీవి తీవ్రంగా ప్రతిస్పందించారు. వారి పేర్లను ప్రస్తావించకపోయినప్పటికీ ఆయన మాటలు వారిని ఉద్దేశించినవేనని చెప్పవచ్చు. కడప జిల్లాలో శనివారం కూడా ఆయన ప్రజాచైతన్య యాత్ర కొనసాగుతోంది. రక్తం అమ్ముకునేంత హీనస్థితికి దిగజారలేదని చిరంజీవి అన్నారు. బ్లడ్‌ బ్యాంక్‌పై విమర్శలు చేయడం సిగ్గుచేటన్నారు.

ఉత్తమ వాలెంటరీ అవార్డు, పద్మభూషణ్‌ తీసుకున్న తాను చిల్లర వ్యవహారాలకు పాల్పడతానా అంటూ ప్రశ్నించారు. తనపై బురద జల్లేందుకే బ్లడ్‌బ్యాంక్‌పై తప్పుడు మాటలు మాట్లాడుతున్నారని వ్యాఖ్యానించారు. ఏదో ఒక రోజు రాష్ట్రంలో ప్రజారాజ్యం అధికారంలోకి వస్తుందని ఆయన విశ్వాసం వ్యక్తం చేశారు. ఆ విషయం బ్రహ్మంగారే చెప్పారని ఆయన అన్నారు. తనకు అధికారంపై మక్కువ లేదని ఆయన మరోసారి స్పష్టం చేశారు.