సాక్షి డైలీ వార్తాకథనానికి డిఎల్ రవీంద్రారెడ్డి కౌంటర్

హైదరాబాద్‌: సాక్షి దినపత్రిక వార్తకథనానికి కాంగ్రెసు సీనియర్ శాసనసభ్యుడు డిఎల్ రవీంద్రారెడ్డి కౌంటర్ వేశారు. ఎమ్మార్ ప్రాపర్టీస్ వ్యవహారంలో ఎపిఐఐసి వాటా తగ్గించుకోవాలని దివంగత నేత వైయస్ రాజశేఖర రెడ్డి హయాంలో ప్రస్తుత ముఖ్యమంత్రి కె. రోశయ్య నేతృత్వంలోని సబ్ కమిటీ సూచించిందని, డిఎల్ రవీంద్రారెడ్డి, జెసి దివాకర్ రెడ్డి ఆరోపణలు రోశయ్యనే వేలెత్తి చూపుతున్నాయని సాక్షి దినపత్రిక ఇటీవల ఓ వార్తాకథనాన్ని ప్రచురించింది. ఎమ్మార్ లో వాటాలు తగ్గించుకోవాలని రోశయ్య నేతృత్వంలోని సబ్ కమిటీ సూచించలేదని ఆయన సోమవారం మీడియా ప్రతినిధుల సమావేశంలో చెప్పారు.

ఏపీఐఐసీ అక్రమాల్లో ఎమ్మార్‌ పాత్ర కేవలం వందోవంతు మాత్రమేనని డీఎల్‌ రవీంద్రారెడ్డి ఆరోపించారు. ఎమ్మార్‌ ప్రాపర్టీస్‌ అంశంలో ఎన్నో వ్యక్తులు, శక్తులు ఉన్నాయి వాటి పాత్ర బయటకు రావాలని ఆయన అన్నారు. ఏపీఐఐసీ అక్రమాల్లో రహేజా, ఇందూ, బ్రాహ్మణి తదితర సంస్థలున్నాయని ఆయన తెలిపారు. అక్రమాల నిగ్గు తేలాల్సిన అవసరం ఉందని ఆయన అన్నారు.