‘బాహుబలి’కి ఊపిరి తీసిన తెలుగోళ్లు.. ఊపిరి పోసిన బాలీవుడ్
భారత సినీ చరిత్రను 'బాహుబలికి ముందు.. బాహుబలికి తర్వాత' అని మార్చేసిన ఘనత దర్శకుడు ఎస్.ఎస్. రాజమౌళిది. నేడు ఇండియన్ సినిమా గర్వించదగ్గ మైలురాళ్లలో ఒకటిగా నిలిచిన ఈ సినిమా.. విడుదలైన మొదటి రోజే ఒక పెను సంక్షోభాన్ని ఎదుర్కొందనే చేదు నిజం చాలామందికి తెలియదు. నెట్ఫ్లిక్స్లో తాజాగా విడుదలైన 'బాహుబలి - ది టార్చబేరర్' డాక్యుమెంటరీలో ఆనాటి భయాందోళనలను, ఎదురైన రూ. 70 కోట్ల నష్టాన్ని రాజమౌళి స్వయంగా పంచుకున్నారు.
ఖర్చులు కొండలా పేరుకుపోయేవి
ఆ రోజుల్లో రూ. 150 నుండి రూ. 200 కోట్ల భారీ బడ్జెట్తో ప్రాంతీయ భాషలో సినిమా తీయడం అంటే ఒక రకమైన ఆత్మహత్యా సదృశ్యమే. ప్రతీరోజూ షూటింగ్ ఖర్చులు కొండలా పేరుకుపోయేవి. రేపటి షూటింగ్ కోసం ఈరోజు రాత్రి డబ్బులు సర్దాల్సిన దుస్థితి నిర్మాతలది. కేవలం కొన్ని యాక్షన్ సీక్వెన్స్ల కోసమే కోట్లాది రూపాయలు ఖర్చవడంతో ఆర్కా మీడియా అధినేతలు తీవ్రమైన మానసిక ఒత్తిడికి లోనయ్యారు. ఎన్నో అప్పులు, మరెన్నో అంచనాల మధ్య ఎట్టకేలకు సినిమా థియేటర్లలోకి అడుగుపెట్టింది.
ఎన్నో ఆశలతో అడుగుపెడితే..
ఎన్నో ఆశలతో 'బాహుబలి: ది బిగినింగ్' రిలీజ్ అయినప్పుడు, ముఖ్యంగా తెలుగు రాష్ట్రాల నుండి భారీ వసూళ్లు వస్తాయని మేకర్స్ ఆశించారు. కానీ, సీన్ రివర్స్ అయింది. సినిమా విడుదలైన కొన్ని గంటల్లోనే సోషల్ మీడియాలో నెగటివ్ టాక్, ట్రోల్స్ ఊపందుకున్నాయి. మొదటి రోజు ముగిసేసరికి ట్రేడ్ లెక్కల ప్రకారం సినిమా ఏకంగా రూ. 70 కోట్ల భారీ నష్టాన్ని చూపిస్తోంది. ఐదేళ్ల కష్టానికి మొదటి రోజే ఇలాంటి ఫలితం రావడంతో హీరో ప్రభాస్ తీవ్ర దిగ్భ్రాంతికి, బాధకు గురయ్యారు. తమ ఐదేళ్ల కల కళ్లముందే కుప్పకూలిపోతుందా అనే భయం చిత్ర యూనిట్ను వెంటాడింది.
బ్రహ్మరథం పట్టిన నార్త్
తెలుగులో టాక్ అటు ఇటుగా ఉన్నా, బాలీవుడ్ ప్రేక్షకులు మాత్రం ఈ చిత్రానికి బ్రహ్మరథం పట్టారు. అక్కడ వచ్చిన అద్భుతమైన రెస్పాన్స్ చూశాక మేకర్స్లో మళ్లీ ధైర్యం వచ్చింది. మెల్లగా తెలుగులోనూ మౌత్ టాక్ మారి, నెగటివిటీని దాటుకుని సినిమా బ్లాక్బస్టర్ వైపు దూసుకెళ్లింది. ఆ తర్వాత బాహుబలి సృష్టించిన సునామీ భారతీయ సినిమా రూపురేఖలనే మార్చేసింది. అంతిమంగా 'బాహుబలి: ది బిగినింగ్' ప్రపంచవ్యాప్తంగా రూ. 650 కోట్లు వసూలు చేసి సరికొత్త రికార్డు సృష్టించింది. ఆ నమ్మకంతోనే వచ్చిన రెండో భాగం 'బాహుబలి 2: ది కంక్లూజన్' ఏకంగా రూ. 1,750 కోట్లకు పైగా వసూలు చేసి హిస్టరీ క్రియేట్ చేసింది. ఒక సినిమా అంతిమ విజయాన్ని మొదటి రోజు కలెక్షన్లు లేదా సోషల్ మీడియా టాక్ శాసించలేవు అనడానికి ఇప్పటికీ 'బాహుబలి' ఒక ఉదాహరణగా నిలుస్తోంది.
Click it and Unblock the Notifications
Sign in with Google