వైయస్ జగన్ ను ఒంటరి చేసే వ్యూహంతో సోనియా ఆదేశాలు

హైదరాబాద్: తమ పార్టీ కడప పార్లమెంటు సభ్యుడు వైయస్ జగన్ ను ఒంటరి చేసేందుకు కాంగ్రెసు పార్టీ అధ్యక్షురాలు సోనియా గాంధీ స్వయంగా రంగంలోకి దిగారు. జగన్ వైపు చూడొద్దని రాష్ట్ర పార్లమెంటు సభ్యులకు ఆమె స్వయంగా సూచిస్తున్నట్లు ఓ ప్రముఖ తెలుగు దినపత్రిక ఓ వార్తా కథనాన్ని ప్రచురించింది. జగన్ తో వెళ్లవద్దని శాసనసభ్యులకు కూడా సూచించాలని ఆమె చెబుతున్నట్లు తెలుస్తోంది. విదేశీ యాత్ర నుంచి తిరిగి వచ్చిన తర్వాత సోనియా ప్రదానంగా జగన్ పై దృష్టి మళ్లించినట్లు దిద్దుబాటు చర్యలకు దిగినట్లు తెలుస్తోంది. జగన్ వల్ల పార్టీకి నష్టం జరగకుండా చూసుకునేందుకు ఆమె ప్రయత్నాలు మొదలు పెట్టినట్లు సమాచారం. ఇందులో భాగంగానే ఆంధ్రప్రదేశ్ పార్లమెంటు సభ్యులతో క్రమం తప్పకుండా మాట్లాడుతూ తగిన సూచనలు చేస్తున్నారని అంటున్నారు.

సోనియా తల్లి ఆరోగ్యం గురించి తెలుసుకోవడానికి పార్లమెంటు సభ్యులు ఆమెను కలుస్తున్నారు. ఈ సమయంలో వారితో సోనియా నింపాదిగా మాట్లాడుతూ రాష్ట్ర రాజకీయాల గురించి ఆరా తీస్తున్నారు. జగన్ ప్రస్తావన రాగానే ఆమె నిక్కచ్చిగానే తన నిర్ణయాన్ని చెబుతున్నారని తెలుస్తోంది. జగన్ యాత్రకు ఎవరూ వెళ్లవద్దని ఆమె ఆదేశిస్తున్నట్లు సమాచారం. శాసనసభ్యులకు, స్థానిక నాయకులకు కూడా ఈ విషయం తెలియజేయాలని ఆమె ఎంపిలకు సూచిస్తున్నారు. సోనియా వైఖరి స్పష్టంగా తెలియడంతో ఉత్తరాంధ్ర మహిళా ఎంపి తన వైఖరి మార్చుకున్నట్లు తెలుస్తోంది. అలాగే, తెలంగాణకు చెందిన ఓ యువ ఎంపి కూడా పూర్తిగా మారిపోయారు. మొత్తం మీద జగన్ ను ఒంటరి చేయడమే పనిగా సోనియా పావులు కదుపుతున్నారు.