ప్రకాశం జిల్లాలో వైయస్ జగన్ ఓదార్పు యాత్ర రోశయ్యకు సవాల్

హైదరాబాద్: ప్రకాశం జిల్లాలో సెప్టెంబర్ 3వ తేదీ నుంచి తమ కాంగ్రెసు పార్టీ కడప పార్లమెంటు సభ్యుడు వైయస్ జగన్ తలపెట్టిన ఓదార్పు యాత్ర ముఖ్యమంత్రి కె. రోశయ్యకు సవాల్ గా మారింది. ప్రకాశం తన సొంత జిల్లా కావడంతో జగన్ ఓదార్పు యాత్రకు ప్రజాప్రతినిధులు వెళ్లకుండా చూసేందుకు ఆయన ఇప్పటి నుంచి ప్రయత్నాలు మొదలు పెట్టారు. జిల్లా శాసనసభ్యులతో ఆయన ప్రత్యేకంగా మాట్లాడుతున్నట్లు సమాచారం. ఇందులో భాగంగానే సోమవారం సాయంత్రం దగ్గుబాటి వెంకటేశ్వర రావు ముఖ్యమంత్రిని కలిశారని చెబుతున్నారు. కాగా, ఓదార్పు యాత్రకు అధిష్టానం అనుమతి లేదని ముఖ్యమంత్రి తనను కలిసిన నాయకులకు, ప్రజాప్రతినిధులకు చెబుతున్నారు.

మంత్రి బాలినేని శ్రీనివాస రెడ్డి, వైయస్ రాజశేఖర రెడ్డి తోడల్లుడు సుబ్బా రెడ్డి ప్రత్యేకంగా జగన్ ఓదార్పు యాత్రను విజయవంతం చేసేందుకు ఏర్పాట్లు సాగిస్తున్నారు. ఓదార్పు యాత్రకు అధిష్టానం అనుమతి లేదన్నదానికి పార్టీ అధ్యక్షురాలు సోనియా గాంధీ కేంద్ర మంత్రుల వద్ద, ప్రజాప్రతినిధుల వద్ద స్పందించిన తీరే నిదర్శనమని రోశయ్య అన్నట్లు సమాచారం. ఓ మంత్రి, సీనియర్ శాసనసభ్యుడు తనను సోమవారం కలిసినప్పుడు ఆయన ఆ విధంగా వ్యాఖ్యానించినట్లు వార్తలు వస్తున్నాయి. సోనియా సర్వసాధారణంగా తన మనసులో మాట బయట పెట్టరని, రాష్టానికి చెందిన కేంద్ర మంత్రుల వద్ద, పార్లమెంటు సభ్యుల వద్ద ఆమె స్పందించారంటే తీవ్రత ఎంతగా ఉందో అర్థం చేసుకోవచ్చునని రోశయ్య అన్నట్లు ప్రచారం జరుగుతోంది.