నరసింహన్ తెలంగాణపై నివేదిక ఇవ్వలేదు: పాల్వాయి గోవర్ధన్ రెడ్డి

హైదరాబాద్: రాష్టాన్ని విభజించాల్సి వస్తే హైదరాబాదును కేంద్ర పాలిత ప్రాంతంగా ప్రకటించాలని గవర్నర్ నరసింహన్ కేంద్ర ప్రభుత్వానికి నివేదిక ఇచ్చినట్లు వచ్చిన వార్తలను కాంగ్రెసు సీనియర్ నాయకుడు పాల్వాయి గోవర్ధన్ రెడ్డి ఖండించారు. గవర్నర్ కేంద్రానికి అటువంటి నివేదిక ఏదీ ఇవ్వలేదని ఆయన శుక్రవారం మీడియా ప్రతినిధులతో అన్నారు. రాష్టాన్ని ఓ అదృశ్య శక్తి పాలిస్తోందని, దాన్ని తొలగించడం అవసరమని ఆయన అన్నారు. గత ప్రభుత్వం చేసిన తప్పులకు ప్రస్తుత ముఖ్యమంత్రి కె. రోశయ్యను బాధ్యుడ్ని చేయడం మంచిది కాదని ఆయన అన్నారు. బయ్యారం గనుల లీజును రద్దు చేయడం పట్ల ఆయన హర్షం వ్యక్తం చేశారు.

సెప్టెంబర్ 17వ తేదీ తెలంగాణ విమోచనోత్సవాలను ప్రభుత్వం అధికారికంగా నిర్వహించాలని ఆయన ప్రభుత్వాన్ని కోరారు. గత సంప్రదాయాలను పాటిస్తామని ముఖ్యమంత్రి అనడం సరి కాదని ఆయన అన్నారు. రెండు స్వాతంత్ర్య దినాలుంటాయా అని అన్న తమ కాంగ్రెసు పార్టీ శాసనసభ్యుడు జెసి దివాకర్ రెడ్డి వ్యాఖ్యను ఆయన ఖండించారు. కర్నాటక, మహారాష్ట్రలో అలా రెండు స్వాతంత్ర్య దినోత్సవాలు ఉన్న విషయాన్ని ఆయన గుర్తు చేశారు.