34 దేశాల్లో 'సత్యం' రామలింగరాజు ఆస్తులు

హైదరాబాద్: సత్యం కంప్యూటర్స్ మాజీ చైర్మన్ బి. రామలింగరాజుకు 34 దేశాల్లో ఆస్తులున్నట్లు ఎన్ ఫోర్స్ మెంట్ డైరెక్టరేట్ అధికారులు గుర్తించారు. సత్యం కంప్యూటర్స్‌ నిధులను మళ్లించి రామలింగరాజు వివిధ రాష్ట్రాలు, దేశాల్లో సమకూర్చుకున్న ఆస్తుల స్వాధీనాన్ని ఎన్‌ఫోర్స్‌మెంట్‌ డైరెక్టరేట్‌(ఈడీ) ముమ్మరం చేసింది. విదేశీ ఆస్తుల స్వాధీనం కోసం 34 దేశాలకు లెటరాఫ్‌ రెగొరేటరీలు(ఎల్‌ఆర్‌) పంపింది. వాటిలో కొన్ని దేశాల నుంచి సానుకూల స్పందన వచ్చింది.'సత్యం' నిధులతో రామలింగరాజు సారథ్యంలోని మాజీ యాజమాన్యం తమ కుటుంబసభ్యుల పేర్లమీద పెద్దఎత్తున ఆస్తులు కూడబెట్టుకున్న ఆరోపణలపై ఈడీ దర్యాప్తు చేపట్టిన సంగతి తెలిసిందే.

మన రాష్ట్రంతోపాటు మహారాష్ట్ర, తమిళనాడు, కర్ణాటకల్లో 347 ఆస్తులను అధికారులు గుర్తించారు. 132 మంది పేర్లతో దాదాపు 12వేల ఎకరాలు ఉన్నట్లు తేలింది. వీటిని స్వాధీనం చేసుకునేందుకు ఈడీ అధికారులు నాలుగు దఫాలుగా చట్టపరమైన అనుమతి తెచ్చుకున్నారు. వాస్తవంగా వీటిని రామలింగరాజు కుటుంబసభ్యులే స్వయంగా ఈడీకి దాఖలు పరచాల్సి ఉంది. తమ ఆస్తులు స్వాధీనం చేసుకునే అధికారం ఈడీకి లేదంటూ రామలింగరాజు కుటుంబసభ్యులు హైకోర్టును ఆశ్రయించారు. దీనిపై న్యాయస్థానం ఇంకా ఎలాంటి ఉత్తర్వులు వెలువరించలేదు. ఈడీ అధికారులు మాత్రం గుర్తించిన ఆస్తులను స్వాధీనం చేసుకునే పని మొదలుపెట్టారు. రెండు నెలల నుంచి ఈ కార్యక్రమం నడుస్తోంది. ఇప్పటి వరకూ వందకుపైగా ఆస్తులను స్వాధీనం చేసుకున్నారు. రానున్న రెండు నెలల్లో ఈ ప్రక్రియ మొత్తం పూర్తవుతుందని అధికారులు చెబుతున్నారు.