వైయస్ జగన్ పై చర్యకు కాంగ్రెసు హైకమాండ్ కౌంట్ డౌన్?

న్యూఢిల్లీ: కడప పార్లమెంటు సభ్యుడు వైయస్ జగన్ పై చర్యకు కౌంట్ డౌన్ ప్రారంభమైనట్లు భావిస్తున్నారు. ప్రకాశం జిల్లాలో ఓదార్పు యాత్ర చేపట్టడానికి ముందే జగన్ పై చర్య తీసుకునే దిశగా కాంగ్రెసు హై కమాండ్ కదులుతున్నట్లు వార్తలు వస్తున్నాయి. జగన్ ను మరింత ఉపేక్షించడం వల్ల భారీ నష్టం జరుగుతుందనే ఉద్దేశంతో ఉన్నట్లు తెలుస్తోంది. కడప జిల్లా పులివెందులలో జరిగిన ఓదార్పు యాత్రను దృష్టిలో పెట్టుకుని ప్రకాశం జిల్లా ఓదార్పు యాత్రకు ముందే ఏదైనా చేయకపోతే శాసనసభ్యులపై తీవ్రమైన ఒత్తిడి వచ్చే అవకాశం ఉందని భావించినట్లు తెలుస్తోంది. ఓదార్పు యాత్రలో పాల్గొనని శాసనసభ్యులను వైయస్ వ్యతిరేకులుగా చిత్రీకరించే జగన్ వర్గం ప్రయత్నాన్ని తిప్పికొట్టక తప్పదనే ఉద్దేశంతో ఉన్నట్లు సమాచారం.

పులివెందుల ఓదార్పు యాత్రలో పాల్గొన్న శాసనసభ్యులపై చర్యలు తీసుకోకపోవడం, ముఖ్యమంత్రి మాటను వ్యతిరేకిస్తానని బహిరంగంగా ప్రకటించిన మంత్రి బాలినేని శ్రీనివాస రెడ్డిని ఉపేక్షించడం వంటి కారణాల వల్ల తప్పుడు సంకేతాలు వెళ్తాయని, అది ఓదార్పు యాత్రలో పాల్గొనడానికి ఇష్టపడని శాసనసభ్యులపై తీవ్ర ప్రభావం చూపేట్లుందని భావిస్తోంది. దీంతో జగన్ పైనే నేరుగా చర్య తీసుకునేందుకు సిద్ధపడినట్లు చెబుతున్నారు. ఇందుకు గాను, ముఖ్యమంత్రి కె. రోశయ్యను, ప్రదేశ్ కాంగ్రెసు అధ్యక్షుడు డి. శ్రీనివాస్ ను ఢిల్లీకి పిలిపించినట్లు తెలుస్తోంది. వీరిద్దరు మంగళవారం ఢిల్లీలో ఉంటారు. అలాగే పిసిసి మాజీ అధ్యక్షులను కూడా అందుబాటులో ఉండాలని అధిష్టానం ఆదేశించింది. మొత్తం మీద, జగన్ పై వేటుకు రంగం సిద్ధమైనట్లు తెలుస్తోంది.