సీమాంధ్ర లెక్చరర్లపై భగ్గుమన్న సిటీ కాలేజీ విద్యార్థులు

హైదరాబాద్: సీమాంధ్ర అధ్యాపకులపై తెలంగాణ విద్యార్థుల వ్యతిరేకత కొనసాగుతూనే ఉంది. తాజాగా హైదరాబాదులోని సిటీ కాలేజీ విద్యార్థులు సీమాంధ్ర లెక్చరర్లపై భగ్గుమన్నారు. కాలేజీ నుంచి సీమాంధ్ర లెక్చరర్లు వెళ్లిపోవాలని వారు గురువారం డిమాండ్ చేశారు. సిటీ కాలేజీలో దివంగత నేత వైయస్ రాజశేఖర రెడ్డి వర్ధంతి కార్యక్రమాన్ని తలపెట్టారు. దాన్ని తెలంగాణ విద్యార్థులు వ్యతిరేకించారు. దాంతో సీమాంధ్ర అధ్యాపకులు విద్యార్థులపై తీవ్రంగా విరుచుకుపడ్డారు.

విద్యార్థినులను అవమానించే విధంగా అధ్యాపకులు వ్యాఖ్యలు చేశారు. దీంతో విద్యార్థులు ఆందోళనకు దిగారు. సీమాంధ్ర లెక్చరర్లు సిటీ కాలేజీ నుంచి వెళ్లిపోవాలని డిమాండ్ చేస్తూ రోడ్ల మీదికి వచ్చారు. దాంతో తీవ్ర ఉద్రిక్తత నెలకొంది. భారీగా పోలీసులు మోహరించారు. ఇటీవల ఉస్మానియా విశ్వవిద్యాలయంలో బిఇడి స్పాట్ వాల్యుయేషన్ సందర్భంగా సీమాంధ్ర అధ్యాపకులపై విద్యార్థులు దాడి చేసిన విషయం తెలిసిందే.