చిరంజీవికి టోకరా: వైయస్ జగన్ తో భూమా దంపతులు

కడప: శాసనసభ్యురాలు శోభా నాగిరెడ్డి, భూమా నాగిరెడ్డి దంపతులు ప్రజారాజ్యం పార్టీ అధ్యక్షుడు చిరంజీవికి దూరమైనట్లే కనిపిస్తున్నారు. కాంగ్రెసు కడప పార్లమెంటు సభ్యుడు వైయస్ జగన్ కు అనుకూలంగా వారు మారిపోయినట్లే కనిపిస్తున్నారు. తన భవిష్యత్తు కార్యాచరణపై జగన్ గురువారం తన అనుయాయులతో చర్చలు జరిపారు. ఆ చర్చల్లో వైయస్సార్ సోదరుడు వైయస్ వివేకానంద రెడ్డి, మంత్రి శిల్పా మోహన్ రెడ్డిలతో పాటు ప్రజారాజ్యం శాసనసభ్యురాలు శోభానాగిరెడ్డి, నాగిరెడ్డి పాల్గొన్నారు. వారితో జగన్ విస్తృత చర్చలు జరిపారు.

మరో వైపు కాంగ్రెసు ఆంధ్రప్రదేశ్ వ్యవహారాల ఇంచార్జీ వీరప్ప మొయిలీ గురువారం ఇడుపులపాయలకు రావాల్సి ఉంది. ఆయన ఇడుపుల పాయలో వైయస్ కు నివాళులు అర్పిస్తారు. అదే సమయంలో ఓదార్పు యాత్రపై జగన్ కు నచ్చజెప్పేందుకు ప్రయత్నిస్తారు. అధిష్టానం మాటకు కట్టుబడి ఓదార్పు యాత్రను ఆపాలని చివరి మాటగా ఆయన జగన్ కు చెప్పనున్నారు. గురువారం మధ్యాహ్నం మూడున్నర గంటల వరకు కూడా జగన్ మొయిలీ రాక కోసం ఎదురు చూస్తూనే ఉన్నారు.