ఐటి కంపెనీలు ప్రాంతీయ ఉద్యమాలకు భయపడుతున్నాయి: సిఎం

హైదరాబాద్: ప్రాంతీయ ఉద్యమాలకు ఐటి కంపెనీలు పెట్టుబడులు పెట్టేందుకు భయపడుతున్నాయని ముఖ్యమంత్రి కె. రోశయ్య అన్నారు. ఫిక్కి జాతీయ కార్యవర్గ సమావేశంలో ఆయన మంగళవారం ప్రసంగించారు. హైదరాబాద్ లాంటి నగరాల్లో ఇలాంటి వాతావరణం సరైంది కాదని ఆయన అన్నారు. ప్రాంతీయ ఉద్యమాలు రాష్ట్ర సమగ్రాభివృద్ధికి ఆటంకంగా మారుతాయని ఆయన అభిప్రాయపడ్డారు. పెట్టుబడులు పెట్టేవారికి పూర్తి భద్రత కల్పిస్తామని ఆయన హామీ ఇచ్చారు.

తెలంగాణపై ఉద్యమాలు వద్దని ఆయన సూచించారు. విధ్వంసాలకు దిగేవారిని దీటుగా ఎదుర్కుంటామని ఆయన చెప్పారు. తనకు ప్రాంతీయాభిమానాలు లేవని ఆయన అన్నారు. రాష్ట్ర పరిస్థితిపై అధ్యయనానికి ఏర్పడిన శ్రీకృష్ణ కమిటీ నివేదిక సమర్పించిన తర్వాత కేంద్రం తీసుకునే నిర్ణయానికి అందరూ కట్టుబడి ఉండాలని ఆయన సూచించారు.