వైయస్ జగన్ ఓదార్పు యాత్ర ఆదివారం నుంచే

ఒంగోలు: కాంగ్రెస్ కడప పార్లమెంటు సభ్యుడు వైఎస్ జగన్ రెండో కంటికీ ఇన్ఫెక్షన్ సోకుతున్న నేపథ్యంలో వైద్యుల సూచనలు, ఆప్తుల ఒత్తిడి మేరకు ఓదార్పు యాత్రను ఆదివారం నుంచి నిర్వహించాలని నిర్ణయించారు. కంటి వాపు 60 శాతం మాత్రమే తగ్గింది. దీంతో ఎలాంటి ఇబ్బందీ లేకుండా ఓదార్పుయాత్ర కొనసాగించాలంటే కనీసం మరో నాలుగు రోజులు విశ్రాంతి తప్పనిసరని వైద్యులు చెప్పారు. బుధ, గురువారం విశ్రాంతి అనంతరం శుక్రవారం నుంచి యాత్ర మొదలుపెట్టడానికి జగన్ సిద్ధమైన తరుణంలో డాక్టర్లు ఆంజనేయులు, వేణుగోపాలరెడ్డి గురువారం రాత్రి యువనేతకు పూర్తి పరీక్షలు నిర్వహించారు. ఎడమ కంటితో పాటు కుడి కంటికీ ఇన్ఫెక్షన్ వస్తున్నట్లు గుర్తించిన వారు యాత్ర ప్రమాదమని హెచ్చరించారు. దీంతో ఆప్తులు యాత్ర మరి కొద్ది రోజులు వాయిదా వేసి, వైద్యుల సూచన పాటించాలని ఒత్తిడి చేశారు.

ఇప్పటివరకు ప్రకాశం జిల్లాలో 40శాతం యాత్ర మాత్రమే పూర్తయింది. జిల్లాలో మిగిలిన ప్రాంతాలతో పాటు శ్రీపొట్టి శ్రీరాములు నెల్లూరు జిల్లాలో యాత్ర కొనసాగించాల్సి ఉంది. ఈ పరిస్థితుల్లో వైద్యుల సూచనలు పాటించకుండా యాత్ర కొనసాగించి ఇబ్బంది పడేకంటే మరో రెండు రోజులు విశ్రాంతి తీసుకుని యాత్ర నిరాటంకంగా కొనసాగించడమే ఉత్తమమని భావించినట్లు ఎమ్మెల్సీ జూపూడి ప్రభాకర రావు చెప్పారు. జగన్‌ పై ఒత్తిడి తెచ్చి తాము అంగీకరింపజేశామని, ఆదివారం నుంచి ముందుగా నిర్ణయించిన షెడ్యూల్ ప్రకారం యాత్ర కొనసాగుతుందని ప్రకటించారు.