వైయస్ జగన్ పై రాహుల్ కన్నెర్ర: యువజన కమిటీల రద్దు

హైదరాబాద్: వైఎస్ రాజశేఖర్ రెడ్డి తనయుడు, కడప పార్లమెంటు సభ్యుడు అయిన వైఎస్ జగన్మోహన్ రెడ్డిపై జాతీయ కాంగ్రెసు కమిటీ అధికార ప్రతినిధి, ఎంపీ అయిన రాహుల్ గాంధీ కన్నెర్ర జేశారు. రాష్ట్రంలో ఉన్న తొమ్మిది జిల్లాలలోని అన్ని కాంగ్రెసు కమిటీలు రద్దు చేయాలని రాహుల్ రాష్ట్ర కాంగ్రెసు కమిటీకి స్పష్టమైన ఆదేశాలు జారీ చేశారు. ఆయా జిల్లాలోని గ్రామస్థాయి కమిటీ నుండి జిల్లా స్థాయి కమిటీ వరకు అన్నింటినీ రద్దు చేయాలని ఆదేశించారు. కమిటీలను రద్దు చేయటానికి ఆయన కమిటీలోని అభ్యర్థుల వయసు, నిర్ణీత సమయం అయిపోవటం, పార్టీ ప్రయోజనాలు కాపాడటంలో విఫలం, ఎక్కువ మంది నుండి విమర్శలు రావటం వంటి తదితర కారణాలు చూపిస్తున్నాడు. అయితే రాహుల్ ఈ కారణాలు పైకి చూపిస్తున్నప్పటికీ అంతరంగంలో వేరే కారణాలు ఉన్నాయని పలువురు చెవులు కొరుక్కుంటున్నారు. ఆ కారణాలతో జగన్ వర్గంపై వేటు వేసేందురు ఆలోచిస్తున్నట్టు తెలుస్తోంది.

అధిష్టానం మాట పెడచెవిన పెట్టి ఓదార్పును కొనసాగిస్తున్న జగన్ ను ఎంత సాధ్యమైతే అంతగా ప్రాబల్యం తగ్గించే యోచనలో అధిష్టానం ఉన్నట్టు తెలుస్తోంది. తాజాగా రాహుల్ కమిటీలు రద్దు చేయడానికి కారణాలు ఆయా కమిటీల్లోని సభ్యులంతా జగన్ వర్గం వారు కావడమేనని సమాచారం. రాష్ట్ర కాంగ్రెసు లోని కమిటీలలో చాలా వరకు సభ్యులు జగన్ వర్గీయులు ఉన్నారు. ధిక్కారంతో సాగుతున్న ఓదార్పులో వీరంతా పాల్గొని అధిష్టానానికి మరింత కోపం తెప్పించటంతో రాహుల్ రద్దుకు పూనుకున్నాడు. జగన్ వర్గానికి చెక్కు పెట్టి కిందిస్థాయి నుండి పార్టీని బలోపేతం చేయడానికి రాహుల్ సిద్ధమైనట్టు తెలుస్తోంది. ఇప్పటికే పలువురి జగన్ వర్గీయులపై వేటు పడిన విషయం తెలిసిందే.