ఆంధ్రజ్యోతి దినపత్రిక చంద్రబాబు చేతిలోకి పోదు

హైదరాబాద్: తమ పత్రికను తెలుగుదేశం పార్టీ అధ్యక్షుడు నారా చంద్రబాబు నాయుడుకు విక్రయిస్తున్నట్లు జరుగుతున్న ప్రచారాన్ని ఆంధ్రజ్యోతి దినపత్రిక మేనేజింగ్ డైరెక్టర్ వేమూరి రాధాకృష్ణ ఖండించారు. రాధాకృష్ణ చంద్రబాబు పేరును గానీ తెలుగుదేశం పార్టీ పేరును గానీ ప్రస్తావించలేదు. ఈ మేరకు ఆయన పత్రిలో ఓ వివరణ ఇచ్చారు. 'ఆంధ్రజ్యోతి పత్రిక అమ్మకపు సరుకు కాదు. దాన్ని ఏ రాజకీయ పార్టీకి కానీ, నాయకులకు కానీ, మరెవరికి గానీ విక్రయించబోవడం లేదు. అటువంటి వదంతులన్నీ ఆంధ్రజ్యోతి అభివృద్ధిని, సత్య మార్గాన్నీ వ్యతిరేకిస్తున్న శక్తులు సృష్టిస్తున్నవే. 'ఆంధ్రజ్యోతి'పై పాఠకులలో అవిశ్వాసాన్ని కలిగించడమే వారి ఉద్దేశం. ఎనిమిదేళ్లుగా సాగుతున్న 'ఆంధ్రజ్యోతి' ప్రస్థానం అదే మార్గంలో అదే సాహసంతో కొనసాగుతుంది' అని ఆయన స్పష్టం చేశారు.

ఆంధ్రజ్యోతి దినపత్రికను చంద్రబాబు తన చేతికి తీసుకుంటున్నట్లు, దాంతో అందులో పనిచేస్తున్న తెలంగాణ ప్రాంత జర్నలిస్టులకు ఉద్వాసన పలుకనున్నట్లు పెద్ద యెత్తున ప్రచారం జరుగుతోంది. ఈ ప్రచారం జరుగుతున్న నేపథ్యంలో రాధాకృష్ణ తీవ్రంగా ప్రతిస్పందించారు. అదంతా తన శత్రువులు చేస్తున్న ప్రచారమని ఆయన మండిపడ్డారు. అలాంటి ప్రచారం చేస్తున్నవారిని ఆయన వైరభక్తులుగా అభివర్ణించారు. తమపై శత్రుత్వంతో తమనను ప్రజలకు వారు తమను ప్రజలకు మరింత ప్రేమపాత్రులను చేశారని ఆయన అన్నారు. రాధాకృష్ణ వివరణ కాంగ్రెసు కడప పార్లమెంటు సభ్యుడు వైయస్ జగన్ కు చెందిన సాక్షి దినపత్రిక ప్రచారం చేస్తోందనే అర్థాన్నిస్తోంది.